ചക്കരക്കല്‍(കണ്ണൂര്‍): സി.പി.എം ബ്രാഞ്ച് ഓഫിസിന് നേരെ ബോംബേറ്. ചക്കരക്കല്‍ പഞ്ചായത്ത് സ്റ്റേഡിയത്തിന് സമീപം സി.പി.എം കക്കോത്ത് ബ്രാഞ്ച് ഓഫിസായ ഇ.എം.എസ് മന്ദിരത്തിന് നേരെയാണ് അക്രമികള്‍ ബോംബെറിഞ്ഞത്. കഴിഞ്ഞ ദിവസം പുലര്‍ച്ചെ 2.30നാണ് സംഭവം. സ്‌ഫോടനത്തില്‍ കെട്ടിടത്തിന്റെ ജനല്‍ ചില്ലുകള്‍ തകര്‍ന്നു. ഭിത്തിക്കും കേടുപറ്റി. ആര്‍.എസ്.എസ് പ്രവര്‍ത്തകര്‍ അക്രമം നടത്തിയതായാണ് പരാതി. ചക്കരക്കല്‍ എസ്.ഐ പി. ബിജുവിന്റെ നേതൃത്വത്തിലുള്ള പൊലിസ് സംഘം സ്ഥലത്ത് പരിശോധന നടത്തി. പ്രദേശത്ത് മുന്‍പും സംഘര്‍ഷങ്ങള്‍ ഉണ്ടായിട്ടുണ്ട്. സംഭവത്തെ തുടര്‍ന്ന് ആറു പേരെ പൊലിസ് കസ്റ്റഡിയിലെടുത്തു. സ്ഥലത്ത് പൊലിസ് ക്യാംപ് ചെയ്യുന്നുണ്ട്.