കോഴിക്കോട്: കെ.എസ്.ആര്‍.ടി.സി കോഴിക്കോട് ഡിപ്പോയുടെ നിലവിലെ അവസ്ഥയില്‍ മാറ്റം വരുത്താന്‍ ശക്തമായ നടപടി സ്വീകരിക്കുമെന്ന് എക്‌സൈസ് തൊഴില്‍ മന്ത്രി ടി.പി രാമകൃഷ്ണന്‍. കെ.എസ്.ആര്‍.ടി.സി കോഴിക്കോട് ഡിപ്പോ അഡ്മിനിസ്‌ട്രേറ്റീവ് ബ്ലോക്കിന്റെയും ഗ്യാരേജിന്റെയും ഉദ്ഘാടനം നിര്‍വഹിച്ചു സംസാരിക്കുകയായിരുന്നു അദ്ദേഹം. കോഴിക്കോട് ഡിപ്പോ പൂര്‍ണതയിലെത്തിക്കാന്‍ കെ.എസ്.ആര്‍.ടി.സിയെയും കെ.ടി.ഡി.എഫ്.സിയെയും ഒരുമിച്ച് മുന്നോട്ടു കൊണ്ടുപോകാന്‍ സാധിക്കണം. ഇതിനായി ഗതാഗത മന്ത്രിയുമായി ചര്‍ച്ച നടത്താനും ഉന്നത ഉദ്യോഗസ്ഥരുടെ യോഗം കോഴിക്കോട്ട് വിളിച്ചു ചേര്‍ക്കാനും ആലോചനയുണ്ട്.
സര്‍ക്കാര്‍ ഓഫിസുകള്‍ ഇവിടേക്കു മാറ്റുന്നതടക്കമുള്ള നിര്‍ദേശങ്ങള്‍ സര്‍ക്കാര്‍ പരിശോധിക്കും. കെ.എസ്.ആര്‍.ടി.സി തൊഴിലാളി സംഘടനകളുടെ അഭിപ്രായങ്ങള്‍ക്ക് പരിഗണ നല്‍കാനും സര്‍ക്കാര്‍ തയാറാണെന്നും മന്ത്രി വ്യക്തമാക്കി. ശമ്പളം, പെന്‍ഷന്‍ തുടങ്ങിയ വിഷയങ്ങളില്‍ തൊഴിലാളികളുടെ പ്രശ്‌നങ്ങള്‍ പരിഗണനയ്‌ക്കെടുത്ത് മുന്നോട്ടുപോകും. കെ.എസ്.ആര്‍.ടി.സിയുടെ പ്രശ്‌നങ്ങള്‍ പരിഹരിക്കാന്‍ ദീര്‍ഘവീക്ഷണമുള്ള നടപടികള്‍ക്കു സര്‍ക്കാര്‍ തുടക്കം കുറിച്ചിട്ടുണ്ടെന്നും അദ്ദേഹം കൂട്ടിച്ചേര്‍ത്തു.
എ. പ്രദീപ്കുമാര്‍ എം.എല്‍.എ അധ്യക്ഷനായി. മേയര്‍ തോട്ടത്തില്‍ രവീന്ദ്രന്‍ മുഖ്യാതിഥിയായിരുന്നു. ജില്ലാ പഞ്ചായത്ത് പ്രസിഡന്റ് ബാബു പറശ്ശേരി, കോര്‍പറേഷന്‍ പൊതുമരാമത്ത് സ്ഥിരംസമിതി ചെയര്‍പേഴ്‌സന്‍ ടി.വി ലളിതപ്രഭ, കെ.എസ്.ആര്‍.ടി.സി ഡയറക്ടര്‍ ബോര്‍ഡ് അംഗം കെ.എം ശിവരാമന്‍, ടി.വി ബാലകൃഷ്ണന്‍ മാസ്റ്റര്‍, ഉമര്‍ പാണ്ടികശാല, സി.പി ഹമീദ് സംസാരിച്ചു. കെ.എസ്.ആര്‍.ടി.സി ടെക്‌നിക്കല്‍ എക്‌സിക്യൂട്ടീവ് ഡയറക്ടര്‍ എം.ടി സുകുമാരന്‍ സ്വാഗതവും ജില്ലാ ട്രാന്‍സ്‌പോര്‍ട്ട് ഓഫിസര്‍ ജോഷി ജോണ്‍ നന്ദിയും പറഞ്ഞു.