മാള: അഞ്ചു പവന്‍ സ്വര്‍ണാഭരണങ്ങളും മൊബൈല്‍ ഫോണും ഡ്രൈവിങ് ലൈസന്‍സുമടങ്ങിയ ബാഗ് ഉടമക്ക് തിരികെ നല്‍കി പൊലിസുകാരന്‍ മാതൃകയായി. നെയ്തക്കുടി സ്വദേശിയും കാട്ടൂര്‍ സ്റ്റേഷനിലെ സീനിയര്‍ സി.പി.ഒയുമായ എ.കെ നൗഷാദാണ് പിണ്ടാണി മേനാലി അന്‍സാറിന്റെ ഭാര്യ സാബിറയുടെ കളഞ്ഞുപോയ ബാഗ് തിരിച്ചേല്‍പ്പിച്ചത്.
ഡ്യൂട്ടി കഴിഞ്ഞ് വീട്ടിലേക്ക് വരും വഴിയാണ് ഇന്നലെ 11 മണിയോടെ കരിങ്ങാച്ചിറയില്‍ റോഡില്‍ കിടന്നിരുന്ന ബാഗ് നൗഷാദിന്റെ ശ്രദ്ധയില്‍ പെട്ടത്. ബാഗ് പരിശോധിച്ചപ്പോള്‍ വിലപിടിപ്പുള്ള സാധനങ്ങള്‍ ശ്രദ്ധയില്‍ പെട്ടതിനെ തുടര്‍ന്ന് മാള പൊലിസ് സ്റ്റേഷനില്‍ ബാഗ് ഏല്‍പ്പിച്ചു.
ബാഗിലുണ്ടായിരുന്ന നമ്പറുകള്‍ പരിശോധിച്ചപ്പോള്‍ ഉടമയുടെ നമ്പര്‍ ലഭിക്കുകയും അവരെ സ്റ്റേഷനിലേക്ക് വരുത്തുകയുമായിരുന്നു. തുടര്‍ന്ന് ഉടമക്ക് ബാഗ് തിരിച്ചേല്‍പ്പിച്ചു. വീട്ടില്‍ നിന്നും മാളയിലേക്ക് സ്‌കൂട്ടറില്‍ വരുമ്പോഴാണ് സാബിയക്ക് ബാഗ് നഷ്ടപ്പെട്ടത്.