കൊച്ചി: നടിയെ ആക്രമിച്ച കേസില്‍ സംവിധായകന്‍ നാദിര്‍ഷായുടെ മുന്‍കൂര്‍ ജാമ്യാപേക്ഷയില്‍ വാദം കേള്‍ക്കുന്നത് ഈ മാസം 25 ലേക്ക് മാറ്റി. ചോദ്യം ചെയ്യലിന്‍റെ വിശദമായ റിപ്പോര്‍ട്ട് മുദ്രവെച്ച കവറില്‍ സമര്‍പ്പിക്കണമെന്നും കോടതി നിര്‍ദേശിച്ചു . 

ഇക്കഴിഞ്ഞ ബുധനാഴ്ച ജാമ്യഹര്‍ജിയില്‍ വാദം പൂര്‍ത്തിയായിരുന്നു. നാദിര്‍ഷായോട് അന്വേഷണ സംഘത്തിനു മുന്നില്‍ ഹാജരായി മൊഴി നല്‍കാന്‍ കോടതി നിര്‍ദ്ദേശിച്ചിരുന്നു. ഇതിന്റെ അടിസ്ഥാനത്തില്‍ കഴിഞ്ഞ ദിവസം അന്വേഷണ സംഘം നാദിര്‍ഷയെ ചോദ്യം ചെയ്തിരുന്നു. ആറ് മണിക്കൂറോളമാണ് അന്വേഷണ സംഘം നാദിര്‍ഷയെ ചോദ്യം ചെയ്തത്.

അതിനിടെ പൊലിസ് അറസ്റ്റ് ചെയ്യുമെന്ന് ഭീഷണിപ്പെടുത്തിയിട്ടില്ലെന്നും ഹെക്കോടതിയിലെ മുന്‍കൂര്‍ ജാമ്യാപേക്ഷയില്‍ പറഞ്ഞ കാര്യങ്ങള്‍ മാധ്യമങ്ങള്‍ പെരുപ്പിച്ചു കാട്ടിയതാണെന്നും നാദിര്‍ഷ ചോദ്യം ചെയ്യലിനു ശേഷം പറഞ്ഞു. മാധ്യമ വാര്‍ത്തകളെ തുടര്‍ന്ന് ആശങ്ക ഉണ്ടായിരുന്നു. ഇതാണ് ജാമ്യാപേക്ഷയില്‍ പറഞ്ഞിരുന്നത്.

നടിയെ അക്രമിച്ച കേസിലെ മുഖ്യ പ്രതിയായ പള്‍സര്‍ സുനി അറിയില്ലെന്ന നിലപാടും നാദിര്‍ഷ ആവര്‍ത്തിച്ചു. കാക്കനാട് ജയിലില്‍ വച്ച് പള്‍സര്‍ സുനി തന്നെ വിളിച്ചെന്ന് പൊലിസുകാര്‍ പറഞ്ഞപ്പോഴാണ് അറിയുന്നത്. തന്റെ ഫോണ്‍ റെക്കോര്‍ഡുകള്‍ പൊലിസിന് പരിശോധിക്കാവുന്നതാണെന്നും അദ്ദേഹം പറഞ്ഞു.

സംഭവത്തില്‍ താനും ദിലീപും നിരപരാധികളാണ്. കട്ടപ്പനയിലെ ഋത്വിക് റോഷന്‍ എന്ന ചലച്ചിത്രത്തിന്റെ സെറ്റില്‍ വച്ച് സുനില്‍കുമാറിന് പണം നല്‍കിയിട്ടില്ല. പലരും പല നുണകളും പറഞ്ഞു പരത്തിയെങ്കിലും നിരപരാധിത്വം അന്വേഷണ സംഘത്തെ ബോധ്യപ്പെടുത്താനായി. പൊലിസിന്റെ ഭാഗത്ത് നിന്ന് ഉപദ്രവകരമായ ചോദ്യങ്ങള്‍ ഉണ്ടായിരുന്നില്ലെന്നും അദ്ദേഹം ഇന്നലെ പറഞ്ഞിരുന്നു.