മനാമ: ഹജ്ജ് കഴിഞ്ഞു നാട്ടിലേക്ക് മടങ്ങുകയായിരുന്ന മലയാളി ബഹ്‌റൈന്‍ വിമാനത്താവളത്തില്‍ മരിച്ചു. കരുനാഗപ്പള്ളി ശൂരനാട് സ്വദേശി വിളയിലയ്യത്ത് ഷാഹുല്‍ ഹമീദ് (73) ആണ് കഴിഞ്ഞ ദിവസം രാത്രി ബഹ്‌റൈനില്‍ വെച്ച് മരിച്ചത്.

സഊദിയില്‍ നിന്നു ബഹ്‌റൈന്‍ വഴി പോകുന്ന ഗള്‍ഫ് എയര്‍ വിമാനത്തിലായിരുന്നു യാത്ര. വിമാന ഷെഡ്യൂള്‍ പ്രകാരം ഒക്ടോബര്‍ രണ്ടിന് നാട്ടിലേക്ക് മടങ്ങാനിരുന്ന ഷാഹുല്‍ ഹമീദ് ശാരീരികാസ്വാസ്ഥ്യം മൂലമാണ് നേരത്തെ യാത്ര പുറപ്പെട്ടത്. എന്നാല്‍ ബഹ്‌റൈനിലെത്തിയപ്പോഴേക്കും നെഞ്ചു വേദന അനുഭവപ്പെടുകയും മരണം സംഭവിക്കുകയുമായിരുന്നു.

നേരത്തെ കിങ് ഹമദ് ആശുപത്രിയില്‍ പ്രവേശിപ്പിച്ച് മരണം സ്ഥിരീകരിച്ച ശേഷം മൃതദേഹം സല്‍മാനിയ മെഡിക്കല്‍ കോംപ്ലക്‌സ് മോര്‍ച്ചറിയിലേക്ക് മാറ്റി. ജലീല, റജുല, റുഷ്ദ, ലാലുദ്ദീന്‍, ഷാബിത്, അന്‍സര്‍ എന്നിവര്‍ മക്കളാണ്. നടപടി ക്രമങ്ങള്‍ പൂര്‍ത്തിയാക്കി മൃതദേഹം അടുത്ത ദിവസം നാട്ടിലേക്ക് കൊണ്ടു പോകും.