ന്യൂഡല്‍ഹി: ബനാറസ് ഹിന്ദു സര്‍വകലാശാലയില്‍ വിദ്യാര്‍ഥിനിയെ പീഡിപ്പിച്ചവര്‍ക്കെതിരേ നടപടിയാവശ്യപ്പെട്ടു കാംപസിനുള്ളില്‍ പ്രതിഷേധിച്ചവര്‍ക്കു നേരെ പൊലിസിന്റെ അതിക്രമം. ഇതിനു പിന്നാലെ പൊലിസ് കാംപസിലെത്തി സ്ഥിതിഗതികള്‍ വിലയിരുത്തുകയും സംഘര്‍ഷാവസ്ഥയ്ക്ക് അയവുവരികയും ചെയ്തിരുന്നു. എന്നാല്‍ ശനിയാഴ്ച വൈകീട്ടോടെ വീണ്ടും കോളേജിലെത്തിയ പൊലിസ് വിവേചനരഹിതമായി ലാത്തിച്ചാര്‍ജ്ജ് നടത്തുകയായിരുന്നെന്നാണ് ആരോപണം. അധ്യാപിക ഉള്‍പ്പെടെ നിരവധിപേര്‍ക്കു പരിക്കേറ്റു. വനിതാ ഹോസ്റ്റലില്‍ പുരുഷ പൊലിസ് എത്തി പെണ്‍കുട്ടികളെ തല്ലിച്ചതയ്ക്കുകയായിരുന്നു.
സംഭവത്തില്‍ ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥ് റിപ്പോര്‍ട്ട് തേടി. ഡിവിഷണര്‍ കമ്മീഷണറോടാണ് മുഖ്യമന്ത്രി റിപ്പോര്‍ട്ട് ആവശ്യപ്പെട്ടത്.