ഇരിക്കൂര്‍: വാഹനാപകടങ്ങള്‍ തുടര്‍ക്കഥയായ ആയിപ്പുഴ ജങ്ഷനില്‍  ഇന്നലെയും വാഹനാപകടം. പാലോട്ടു നിന്നും ഇരിക്കൂറിലേക്ക് വരികയായിരുന്ന കാറും ഇരിക്കൂറില്‍നിന്നും കണ്ണൂരിലേക്ക് വരികയായിരുന്ന ബസുമാണ് കൂട്ടിയിടിച്ചത്. ഇന്നലെ രാവിലെ ഒന്‍പതരയ്ക്കാണ് അപകടം. ഇടിയുടെ ആഘാതത്തില്‍ കാര്‍ പൂര്‍ണമായി തകര്‍ന്നു. യാത്രക്കാര്‍ ചെറിയ പരുക്കുകളോടെ രക്ഷപ്പെട്ടു. അപകടം സ്ഥിരമായി നടക്കുന്ന മരമില്‍ സ്‌റ്റോപ്പിലും ആയിപ്പുഴ ജങ്ഷന്‍ ബസ് ഷെല്‍ട്ടറിനുമിടയിലാണ് അപകടമുണ്ടായത്.  മട്ടന്നൂര്‍ പൊലിസ് സ്ഥലത്തെത്തി ബസും കാറുംകസ്റ്റഡിയിലെടുത്തു. അപകടത്തെ തുടര്‍ന്ന് ഈ റൂട്ടില്‍ ഏറെ നേരം ഗതാഗതം മുടങ്ങി. ഇവിടെ നേരത്തെ നടന്ന അപകടങ്ങളില്‍ ആറുപേര്‍ക്ക് ജീവന്‍ നഷ്ടപ്പെടുകയും 15 പേര്‍ക്ക് ഗുരുതരമായി പരുക്കേല്‍ക്കുകയും ചെയ്തിട്ടുണ്ട്. നിരവധി വാഹനാ അപകടങ്ങള്‍ ആയിപ്പുഴയില്‍ നടന്നിട്ടും  പൊലിസ് നടപടിയെടുക്കുന്നില്ലെന്ന പരാതി വ്യാപകമാണ്.