ബംഗളൂരൂ: മുതിര്‍ന്ന മാധ്യമപ്രവര്‍ത്തക ഗൗരി ലങ്കേഷിന്റെ കൊലപാതകം സംബന്ധിച്ച അന്വേഷണം നിര്‍ണായക ഘട്ടത്തില്‍.
ഗൗരിയുടെ വീട്ടില്‍ സ്ഥാപിച്ചിരുന്ന രണ്ട് സി.സി ടി.വി ക്യാമറകളിലെ ദൃശ്യങ്ങള്‍ വിദഗ്ധ പരിശോധനയ്ക്കായി അമേരിക്കയിലെ ഡിജിറ്റല്‍ ലാബിലേക്ക് അയച്ചു. പ്രതികളുടെ ചിത്രങ്ങള്‍ക്ക് കൂടുതല്‍ വ്യക്തത വരുത്താനാണ് ലാബിന് ദൃശ്യങ്ങള്‍ കൈമാറിയത്.
ഗൗരി ലങ്കേഷിന്റെ കൊലപാതക കേസിന്റെ അന്വേഷണത്തില്‍ ഏറെ നിര്‍ണായകമായ സി.സി ടി.വി ദൃശ്യങ്ങളുടെ വ്യക്തതക്കുറവ് അന്വേഷണ പുരോഗതിക്ക് തടസമാകുന്ന സാഹചര്യത്തിലാണ് വിദഗ്ധ പരിശോധനയ്ക്ക് പ്രത്യേക അന്വേഷണ സംഘം ഒരുങ്ങിയത്. ഐ.ജി ബി.കെ സിങിന്റെ മേല്‍നോട്ടത്തിലുള്ള 21 അംഗ പ്രത്യേക അന്വേഷണ സംഘമാണ് കേസ് അന്വേഷിക്കുന്നത്.
സെപ്റ്റംബര്‍ അഞ്ചിനാണ് ഫാസിസത്തിനെതിരേ നിലകൊണ്ട മാധ്യമ പ്രവര്‍ത്തക ഗൗരി ലങ്കേഷ് കൊല്ലപ്പെട്ടത്. ബംഗളൂരുവിലെ വീട്ടില്‍ വച്ചാണ് അവര്‍ക്ക് വെടിയേറ്റത്.