കൊച്ചി: മുന്‍ മന്ത്രി ഇ.പി ജയരാജനടക്കമുള്ളവര്‍ക്കെതിരേയുള്ള ബന്ധുനിയമനക്കേസ് ഹൈക്കോടതി റദ്ദാക്കി. കേസ് റദ്ദാക്കണമെന്നാവശ്യപ്പെട്ട് ഇ.പി ജയരാജന്‍ നല്‍കിയ ഹരജിയിലാണ് സിംഗിള്‍ബെഞ്ചിന്റെ നടപടി.
ബന്ധു നിയമനക്കേസിന്റെ എഫ്.ഐ.ആറും തുടര്‍ നടപടികളും ഹൈക്കോടതി റദ്ദാക്കിയതോടെ പോള്‍ ആന്റണി, പി.കെ സുധീര്‍ എന്നിവര്‍ക്കെതിരായ നടപടികളും ഇല്ലാതായി. ഈ കേസില്‍ സ്വജനപക്ഷപാതത്തെ അഴിമതിയായി ചിത്രീകരിക്കാന്‍ കഴിയില്ലെന്നും വിജിലന്‍സ് കേസിനാവശ്യമായ വസ്തുതകള്‍ കേസിലില്ലെന്നും വിലയിരുത്തിയാണ് സിംഗിള്‍ ബെഞ്ചിന്റെ ഉത്തരവ്.
ഹരജി പരിഗണിച്ച സിംഗിള്‍ബെഞ്ച് അഴിമതി നിരോധന നിയമപ്രകാരം കേസ് നിലനില്‍ക്കുമോയെന്നതാണ് പരിശോധിച്ചത്.
ഈ കേസില്‍ അഴിമതി നിരോധന നിയമം അനുസരിച്ച് നടപടി സാധ്യമാണോയെന്ന് വിശദീകരിക്കാന്‍ അന്വേഷണ ഉദ്യോഗസ്ഥനോടു നിര്‍ദേശിച്ചിരുന്നു. എന്നാല്‍ കൃത്യമായ വിശദീകരണം നല്‍കിയിരുന്നില്ല. തുടര്‍ന്ന് കേസ് നിലനില്‍ക്കുമോ ഇല്ലയോ എന്ന കാര്യം കൃത്യമായി രേഖപ്പെടുത്തി വിശദീകരണം നല്‍കാന്‍ നിര്‍ദേശിച്ചു.
തുടര്‍ന്ന് അന്വേഷണ ഉദ്യോഗസ്ഥനായ വിജിലന്‍സ് ഡിവൈ.എസ്.പി കെ.വി മഹേഷ് ദാസ് കേസ് നിലനില്‍ക്കില്ലെന്ന് വിശദീകരണം നല്‍കി. ഇതു കൂടി കണക്കിലെടുത്താണ് ഹൈക്കോടതി കേസ് റദ്ദാക്കിയത്. ജയരാജന്‍ വ്യവസായമന്ത്രിയായി ചുമതലയേറ്റശേഷം തന്റെ ബന്ധുവായ പി.കെ സുധീറിന് കേരള സ്റ്റേറ്റ് ഇന്‍ഡസ്ട്രിയല്‍ എന്റര്‍പ്രൈസസ് ലിമിറ്റഡിന്റെ എം.ഡിയായി നിയമനം നല്‍കിയതിനെതിരേവിജിലന്‍സ് കേസെടുത്തിരുന്നു.
ജയരാജനു പുറമേ പി.കെ സുധീര്‍, വ്യവസായ വകുപ്പ് സെക്രട്ടറി പോള്‍ ആന്റണി എന്നിവരെ പ്രതിചേര്‍ത്താണ് വിജിലന്‍സ് കേസെടുത്തിരുന്നത്. ഈ കേസാണ് റദ്ദാക്കിയത്.