മലപ്പുറം: വേങ്ങര ഉപതെരഞ്ഞെടുപ്പില്‍ കേരള കോണ്‍ഗ്രസ് (എം) ലീഗിനെ പിന്തുണക്കുമെന്ന് ചെയര്‍മാന്‍ കെ.എം മാണി. കഴിഞ്ഞ ലോക്‌സഭ ഉപതെരഞ്ഞെടുപ്പില്‍ മലപ്പുറത്ത് യു.ഡി.എഫിന്റെ കുഞ്ഞാലിക്കുട്ടിയെ പിന്തുണച്ചതിന്റെ അടിസ്ഥാനത്തിലാണ് കുഞ്ഞാലിക്കുട്ടിയുടെ ഒഴിവിലേക്ക് നടക്കുന്ന തെരഞ്ഞെടുപ്പിലും ലീഗിനെ പിന്തുണക്കുന്നതെന്നും മാണി പറഞ്ഞു.

എന്നാല്‍, ഇത് മുന്നണിയിലേക്കുള്ള പ്രവേശനമായി വ്യാഖ്യാനിക്കേണ്ടെന്നും മാണി പറഞ്ഞു. പാലായില്‍ വാര്‍ത്താസമ്മേളനത്തില്‍ സംസാരിക്കുകയായിരുന്നു അദ്ദേഹം. യു.ഡി.എഫിലേക്ക് ഇപ്പോഴില്ലെന്നും കേരള കോണ്‍ഗ്രസിനോട് അനുഭാവം കാട്ടി പാര്‍ട്ടികളോട് ആദരവുണ്ടെന്നും മാണി കൂട്ടിച്ചേര്‍ത്തു.