റിയോ ഡി ജനീറോ: ഷൂട്ടിങില്‍ ഇന്ത്യന്‍ താരങ്ങളുടെ കഷ്ടകാലം അവസാനിക്കുന്നില്ല. 50 മീറ്റര്‍ റൈഫിള്‍ പ്രോണ്‍ വിഭാഗത്തില്‍ ഇന്ത്യ ഏറെ പ്രതീക്ഷ പുലര്‍ത്തിയിരുന്ന ഗഗന്‍ നരംഗും ചെയ്ന്‍ സിങും ഫൈനല്‍ കാണാതെ പുറത്തായി. യോഗ്യതാ റൗണ്ടില്‍ 623.1 പോയിന്റോടെ 13ാം സ്ഥാനത്തെത്താനേ നരംഗിന് സാധിച്ചുള്ളൂ. 619.6 പോയിന്റോടെ  ചെയ്ന്‍ സിങ് ഫിനിഷ് ചെയ്തത് 36ാം സ്ഥാനത്താണ്.
മത്സരത്തിലുനീളം മുന്‍തൂക്കം ഉണ്ടായിരുന്ന നരംഗ് അവസാന റൗണ്ടില്‍ പിന്നോക്കം പോവുകയായിരുന്നു. ഒരു ഘട്ടത്തില്‍ നാലാം സ്ഥാനത്തായിരുന്നു നരംഗ്.
എന്നാല്‍ ഈ മികവ് പിന്നീടങ്ങോട്ട് താരത്തിന് നഷ്ടമായി. അതേസമയം ചെയ്ന്‍ സിങിന് മത്സരത്തില്‍ കാര്യമായൊന്നും ചെയ്യാന്‍ സാധിച്ചില്ല. ഇരുവര്‍ക്കും നാളെ 50 മീറ്റര്‍ റൈഫിള്‍ ത്രീ പൊസിഷനില്‍ മത്സരമുണ്ട്.