മലപ്പുറം: സമസ്ത കേരള ജംഇയ്യത്തുല്‍ ഉലമ കേന്ദ്ര മുശാവറ അംഗം കാപ്പില്‍ വി ഉമര്‍ മുസ്‌ലിയാരുടെ മരണവാര്‍ത്തയറിഞ്ഞ് വെട്ടത്തൂര്‍കാപ്പിലെ വസതിയിലേക്ക് ജനപ്രവാഹം. ഇന്നലെ രാത്രി 9.30ഓടെ നിര്യാതനായ ഉസ്താദിനെ അവസാനമായി ഒരു നോക്കുകാണാന്‍ നൂറുകണക്കിനുപേരാണ് രാത്രി തന്നെ വീട്ടിലെത്തിയത്. എല്ലാരംഗത്തും സജീവമായിരുന്ന ഇദ്ദേഹം വാര്‍ധക്യസഹജമായ രോഗത്തെ തുടര്‍ന്ന് നാലുവര്‍ഷമായി വീട്ടില്‍ വിശ്രമത്തിലായിരുന്നു. എസ്.കെ.എസ്. എസ്.എഫ് മലപ്പുറം ജില്ലാ കമ്മിറ്റിയും ദാറുന്നജാത്ത് ഖത്തര്‍ ചാപ്റ്ററും സംയുക്തമായി നല്‍കുന്ന രണ്ടാമത് കെ.ടി മാനു മുസ്‌ലിയാര്‍ അവാര്‍ഡിന് ഇത്തവണ ഇദ്ദേഹമാണ് അര്‍ഹനായത്. 2017 ജനുവരി ആദ്യവാരത്തില്‍ പാണക്കാട് സയ്യിദ് ഹമീദലി ശിഹാബ് തങ്ങളാണ് അവാര്‍ഡ് സമ്മാനിച്ചത്. വിദ്യാഭ്യാസ പ്രബോധനരംഗത്ത് നല്‍കിയ സംഭാവനകള്‍ മുന്‍നിര്‍ത്തിയാണ് അവാര്‍ഡ് നല്‍കിയത്.

രാത്രി 11ഓടെ ജനാസ കുളിപ്പിക്കല്‍ പൂര്‍ത്തിയാക്കി നിസ്‌കാരം ആരംഭിച്ചു. രാത്രി വൈകി ആരംഭിച്ച ജനാസനിസ്‌കാരത്തില്‍ നൂറുകണക്കിനു പേരാണ് പങ്കെടുത്തത്. രാവിലെ തവണകളായി ജനാസനിസ്‌കാരം സംഘടിപ്പിക്കുന്നതിനുള്ള സജ്ജീകരണം ഒരുക്കിയിട്ടുണ്ട്. ഇന്ന് ഉച്ചക്ക് 12ന് കാപ്പ് ജുമാമസ്ജിദില്‍ വച്ച് അവസാന ജനാസനിസ്‌ക്കാരം നടക്കും. മരണവാര്‍ത്തയറിഞ്ഞ് സമസ്ത കേരള ജംഇയ്യത്തുല്‍ ഉലമ ജില്ലാ ജനറല്‍ സെക്രട്ടറി പി കുഞ്ഞാണി മുസ്‌ലിയാര്‍, കേന്ദ്ര മുശാവറ അംഗം ഹൈദര്‍ ഫൈസി പനങ്ങാങ്ങര, ഒ.എം.എസ് തങ്ങള്‍ മേലാറ്റൂര്‍, കെ.സി അബൂബക്കര്‍ ദാരിമി, എ.കെ ആലിപ്പറമ്പ്, ശഹീര്‍ അന്‍വരി, പി അബ്ദുല്‍ ഹമീദ് എം.എല്‍.എ, പി.കെ അബ്ദുസമദ് ഫൈസി, മുഹമ്മദ് കുട്ടി ഫൈസി അലനല്ലൂര്‍ തുടങ്ങിയ പ്രമുഖര്‍ വീട് സന്ദര്‍ശിച്ച് പ്രാര്‍ഥന നടത്തി.