ദുബൈ: ഐ.സി.സി ഏകദിന റാങ്കിങില്‍ ഇന്ത്യന്‍ താരങ്ങള്‍ക്ക് മുന്നേറ്റം. ആസ്‌ത്രേലിയക്കെതിരായ ഏകദിന പരമ്പര 4-1ന് സ്വന്തമാക്കിയതാണ് താരങ്ങള്‍ക്ക് ഗുണകരമായത്. ഓപണര്‍ രോഹിത് ശര്‍മയാണ് ഏറ്റവുമധികം നേട്ടമുണ്ടായത്. അഞ്ചാം സ്ഥാനത്തേക്കാണ് താരം മുന്നേറിയത്. നാലു സ്ഥാനം മെച്ചപ്പെടുത്തിയാണ് രോഹിത്തിന്റെ മുന്നേറ്റം.
പരമ്പരയിലെ അവസാന മത്സരത്തില്‍ സെഞ്ച്വറി നേടിയ രോഹിത് ടൂര്‍ണമെന്റില്‍ 296 റണ്‍സ് സ്വന്തമാക്കിയിരുന്നു. രോഹിത്ത് കരിയറില്‍ ഇതുവരെ സ്വന്തമാക്കിയിട്ടുള്ള ഏറ്റവുമുയര്‍ന്ന റാങ്കും ഇതുതന്നെയാണ്. ഇന്ത്യന്‍ നായകന്‍ വിരാട് കോഹ്‌ലി ഒന്നാം സ്ഥാനം നിലനിര്‍ത്തിയിട്ടുണ്ട്. അജിന്‍ക്യ രഹാനെയും കേദാര്‍ ജാദവും റാങ്കിങില്‍ നേട്ടമുണ്ടാക്കിയിട്ടുണ്ട്. നാലു സ്ഥാനം മെച്ചപ്പെടുത്തി 24ാം റാങ്കിലേക്ക് രഹാനെ മുന്നേറിയപ്പോള്‍, ജാദവ് എട്ടു സ്ഥാനം മെച്ചപ്പെടുത്തി 36ാം സ്ഥാനത്താണ്. ബൗളിങില്‍ അക്ഷര്‍ പട്ടേല്‍ പത്തു സ്ഥാനം മെച്ചപ്പെടുത്തി ഏഴാം സ്ഥാനത്തേക്ക് മുന്നേറി. ദക്ഷിണാഫ്രിക്കയുടെ ഇമ്രാന്‍ താഹിറാണ് ഒന്നാം സ്ഥാനത്ത്. മറ്റു രണ്ടു സ്പിന്നര്‍മാരായ യുസ്‌വേന്ദ്ര ചാഹലും കുല്‍ദീപ് യാദവും നേട്ടമുണ്ടാക്കിയിട്ടുണ്ട്. ചഹല്‍ 75ാം സ്ഥാനത്തേക്കും കുല്‍ദീപ് 80ാം സ്ഥാനത്തേക്കും മുന്നേറി.