ന്യൂഡല്‍ഹി: മുസ്‌ലിം യൂത്ത് ലീഗ് പ്രവര്‍ത്തകന്‍ അരിയില്‍ ഷുക്കൂറിനെ കൊലപ്പെടുത്തിയ കേസിന്റെ അന്വേഷണം സി.ബി.ഐക്കു വിട്ട് ഹൈക്കോടതി നടത്തിയ പരാമര്‍ശങ്ങളെ സുപ്രിംകോടതി വിമര്‍ശിച്ചു. അത്തരം പരാമര്‍ശങ്ങള്‍ അനാവശ്യമാണെന്നും കേസിന്റെ വിചാരണയെ ബാധിക്കുമെന്നും സുപ്രിംകോടതി അഭിപ്രായപ്പെട്ടു.
ഹൈക്കോടതിയുടെ പരാമര്‍ശങ്ങള്‍ നീക്കണമെന്നാവശ്യപ്പെട്ട് കേസില്‍ പ്രതിചേര്‍ക്കപ്പെട്ട സി.പി.എം നേതാവ് പി. ജയരാജന്‍ നല്‍കിയ ഹരജി പരിഗണിക്കവെ ജസ്റ്റിസ് കുര്യന്‍ ജോസഫ് അധ്യക്ഷനായ രണ്ടംഗ സുപ്രിംകോടതി ബെഞ്ചാണ് ഹൈക്കോടതിയുടെ നടപടിയെ വിമര്‍ശിച്ചത്. ഇത്തരം പരാമര്‍ശങ്ങള്‍ തെറ്റാണെന്നും അതു വിചാരണയെ സ്വാധീനിക്കാനിടയുണ്ടെന്നും കോടതി വ്യക്തമാക്കി.
സംസ്ഥാന സര്‍ക്കാര്‍ കുറ്റപത്രം സമര്‍പ്പിച്ചിരിക്കെ കേസ് സി.ബി.ഐക്കു വിടേണ്ട ആവശ്യം ഉണ്ടായിരുന്നോ എന്നും ഹൈക്കോടതിയുടെ ഈ നടപടി ശരിയായ വിധത്തിലുള്ളതാണോയെന്നും പരിശോധിക്കും. ഒരുകേസില്‍ കുറ്റപത്രം സമര്‍പ്പിച്ചാല്‍ കൂടുതല്‍ അന്വേഷണത്തിനു ഉത്തരവിടാന്‍ ഹൈക്കോടതിക്ക് അധികാരമുണ്ട്. എന്നാല്‍, കേസ് സി.ബി.ഐക്കു വിട്ട സാഹചര്യത്തില്‍ നിലവിലെ സ്ഥിതിഗതികള്‍ അറിയേണ്ടതുണ്ടെന്നും സുപ്രിംകോടതി വ്യക്തമാക്കി.
ഇക്കാര്യവും സി.ബി.ഐ അന്വേഷണത്തിലെ പുരോഗതിയും അറിയിക്കണമെന്നാവശ്യപ്പെട്ട് കോടതി സി.ബി.ഐക്ക് നോട്ടിസ് അയക്കുകയുംചെയ്തു.
ഇന്നലെ കേസ് പരിഗണിക്കവേ ഷുക്കൂര്‍ വധം പൊലിസ് ശരിയായി അന്വേഷിച്ചില്ലെന്ന് ഹൈക്കോടതിയെ അറിയിച്ച മുന്‍ ഡി.ജി.പി സെന്‍കുമാറിനെ ജയരാജനുവേണ്ടി ഹാജരായ ആര്‍. ബസന്ത് നിശിതമായി വിമര്‍ശിച്ചു.
നിയമസഭാ തെരഞ്ഞെടുപ്പിന് തൊട്ടുമുന്‍പ് ഇത്തരത്തില്‍ റിപ്പോര്‍ട്ട് നല്‍കിയതിലൂടെ സെന്‍കുമാര്‍ രാഷ്ട്രീയം കളിച്ചു. സര്‍ക്കാര്‍ ഉദ്യോഗസ്ഥര്‍ രാഷ്ട്രീയം കളിക്കുന്നത് തടയണമെന്നും അദ്ദേഹം ആവശ്യപ്പെട്ടു.
കേസന്വേഷണം നടന്ന് ഒരുവര്‍ഷം കഴിഞ്ഞിട്ടാണ് അന്വേഷണം മോശമായിരുന്നുവെന്ന് അന്നത്തെ ഡി.ജി.പി പറഞ്ഞത്. ഇത്തരം തെറ്റായ പ്രവണതകള്‍ കോടതി അവസാനിപ്പിക്കണമെന്നും അദ്ദേഹം ആവശ്യപ്പെട്ടു.
2012 ഫെബ്രുവരി 20നാണ് യൂത്ത് ലീഗ് പ്രവര്‍ത്തകനായ ഷുക്കൂര്‍ കൊല്ലപ്പെട്ടത്. സി.പി.എം കണ്ണൂര്‍ ജില്ലാ സെക്രട്ടറി പി. ജയരാജനും ടി.വി രാജേഷ് എം.എല്‍.എയും സഞ്ചരിച്ചിരുന്ന കാറിനു നേരെ ലീഗ് പ്രവര്‍ത്തകര്‍ ആക്രമണം നടത്തിയെന്നാരോപിച്ച് ഷുക്കൂറിനെ സി.പി.എം പ്രവര്‍ത്തകര്‍ കൊലപ്പെടുത്തിയെന്നാണ് പ്രോസിക്യൂഷന്‍ കേസ്.