വാരണാസി: ഗൊരഖ്പൂര്‍ കൂട്ടക്കുരുതിക്കു പിന്നാലെ ഉത്തര്‍പ്രദേശില്‍ നിന്ന് മറ്റൊരു ദാരുണ സംഭവം കൂടി. പ്രധാനമന്ത്രി നരേന്ദ്ര മോദിയുടെ ലോക്‌സഭാ മണ്ഡലത്തിലാണ് അനസ്‌തേഷ്യ മരുന്നിനു പകരം വ്യാവസായികാവശ്യത്തിനുള്ള വാതകം ഉപയോഗിച്ചതിനെ തുടര്‍ന്ന് 14 രോഗികള്‍ കൊല്ലപ്പെട്ട സംഭവമുണ്ടായത്.
ബനാറസ് സര്‍വകലാശാലയോടു ചേര്‍ന്നുള്ള സുന്ദര്‍ലാല്‍ ആശുപത്രിയിലാണ് രാജ്യത്തെ ഞെട്ടിച്ച അപകടം. സംഭവത്തില്‍ അലഹബാദ് ഹൈക്കോടതി സ്വമേധയാ കേസെടുത്ത് അന്വേഷണത്തിന് ഉത്തരവിട്ടു. ഇതിനിടയില്‍ ഉത്തര്‍പ്രദേശ് സര്‍ക്കാരും കേന്ദ്ര സര്‍ക്കാരും അന്വേഷണത്തിന് ഉത്തരവിട്ടിട്ടുണ്ട്. കഴിഞ്ഞ ജൂണ്‍ ആറിനും എട്ടിനും ഇടയിലാണ് ആശുപത്രി അധികൃതരുടെ അനാസ്ഥ കാരണം ദുരന്തമുണ്ടായതെങ്കിലും ഇക്കാര്യം പുറത്തുവന്നത് ഇന്നലെയാണ്. അലഹബാദ് സ്വദേശി മെഹ്്‌രാജ് അഹമ്മദ് ജൂണ്‍ 14ന് നല്‍കിയ പരാതിയെ തുടര്‍ന്നുള്ള അന്വേഷണമാണ് സംഭവം പുറത്തെത്താനിടയായത്. അനസ്‌തേഷ്യ മേധാവി ഡോ. പി. രഞ്ജന്‍ ഉള്‍പ്പെടെയുള്ള നാല് ഡോക്ടര്‍മാര്‍ക്കെതിരേയാണ് പരാതി.
അനസ്‌തേഷ്യ മരുന്നിനുപകരം നൈട്രസ് ഓക്‌സൈഡ് ആണ് ഡോക്ടര്‍മാര്‍ ഉപയോഗിച്ചതെന്ന് ഉത്തര്‍പ്രദേശ് ഫുഡ് സേഫ്റ്റി ആന്‍ഡ് ഡ്രഗ്‌സ് അഡ്മിനിസ്‌ട്രേഷന്‍സ് നടത്തിയ അന്വേഷണത്തില്‍ കണ്ടെത്തിയിട്ടുണ്ട്.
സംഭവവമുമായി ബന്ധപ്പെട്ട് ആര്‍ക്കെതിരേയും ഇതുവരെ നടപടിയെടുത്തിട്ടില്ല. എന്നാല്‍ എങ്ങനെയാണ് നൈട്രസ് ഓക്‌സൈഡ് ഉപയോഗിക്കാന്‍ ഇടയായത് എന്നത് അന്വേഷിച്ചുകൊണ്ടിരിക്കുകയാണെന്ന് ആശുപത്രി മാനേജ്‌മെന്റ് അറിയിച്ചു. അലഹബാദ് കേന്ദ്രീകരിച്ചുള്ള സ്വകാര്യ കമ്പനിയായ പരേഹത് ഇന്‍ഡസ്ട്രിയല്‍ എന്റര്‍പ്രൈസസ് ആണ് ആശുപത്രിയിലേക്ക് നൈട്രസ് ഓക്‌സൈഡ് വിതരണം ചെയ്യുന്നത്. എന്നാല്‍ ഈ കമ്പനിക്ക് മെഡിക്കല്‍ വാതകങ്ങള്‍ നിര്‍മിക്കാനോ വില്‍ക്കാനോ ഉള്ള അനുമതിയില്ലെന്ന് സംസ്ഥാന സര്‍ക്കാര്‍ പറയുന്നു.
ചിരിവാതകം എന്നറിയപ്പെടുന്ന നൈട്രസ് ഓക്‌സൈഡ് ചെറിയ രീതിയില്‍ വൈദ്യരംഗത്ത് ഉപയോഗിക്കാറുണ്ട്. മയക്കത്തിനും വേദനസംഹാരിയുമായിട്ട് ഉപയോഗിക്കുന്ന ഇത് പരിധി വിട്ടാല്‍ തലച്ചോറിന്റെ പ്രവര്‍ത്തനങ്ങളെ ബാധിക്കും.