അഡിസ് അബാബ: രാഷ്ട്രപതി രാംനാഥ് കോവിന്ദിന്റെ ആദ്യ വിദേശയാത്രയ്ക്കു തുടക്കം. ആഫ്രിക്കന്‍ രാജ്യങ്ങളില്‍ സന്ദര്‍ശനം നടത്തുന്ന അദ്ദേഹം ബുധനാഴ്ച ജിബൂത്തിയിലെത്തിയിരുന്നു. അവിടെ പ്രധാനമന്ത്രി കാമില്‍ മുഹമ്മദുമായി കൂടിക്കാഴ്ച നടത്തി നയതന്ത്ര കരാറുകളില്‍ ഒപ്പിട്ട ശേഷം ഇന്നലെ എത്യോപ്യയുടെ തലസ്ഥാനമായ അഡിസ് അബാബയില്‍ വിമാനമിറങ്ങി.
ജിബൂത്തി സന്ദര്‍ശിക്കുന്ന ആദ്യ ഇന്ത്യന്‍ രാഷ്ട്രപതിയായ അദ്ദേഹം 45 വര്‍ഷങ്ങള്‍ക്കു ശേഷം എത്യോപ്യ സന്ദര്‍ശിക്കുന്ന ആദ്യത്തെ രാഷ്ട്രപതിയായും ചരിത്രമെഴുതി. കോവിന്ദിനെ എത്യോപ്യന്‍ പ്രസിഡന്റ് മുലാത്തു ടെഷോം വിമാനത്താവളത്തിലെത്തി സ്വീകരിച്ചു. ഇന്ത്യ-എത്യോപ്യ ബിസിനസ് ഡയലോഗില്‍ സംസാരിച്ച രാഷ്ട്രപതി ഫെഡറേഷന്‍ ഓഫ് ഇന്ത്യന്‍ ചേംബേഴ്‌സ് ഓഫ് കൊമേഴ്‌സ് ആന്‍ഡ് ഇന്‍ഡസ്ട്രീസ് നടത്തുന്ന ഇന്ത്യന്‍ ടെക്‌നോളജി ആന്‍ഡ് ഇനൊവേഷന്‍ എക്‌സ്‌പൊസിഷന്‍ എന്ന ചടങ്ങ് ഉദ്ഘാടനം ചെയ്തു.