തലശേരി: ജോലികഴിഞ്ഞ് വാഹനങ്ങളില്‍ മടങ്ങുകയായിരുന്ന യുവാക്കള്‍ക്ക് നേരെ അക്രമം. ശനിയാഴ്ച രാത്രി ഏഴേകാലോടെ കക്കറക്കും ഡയമണ്ട്മുക്കിനുമിടയിലാണ് ഒരു സംഘം വാഹനങ്ങള്‍ തടഞ്ഞ് ജോലികഴിഞ്ഞ് മടങ്ങുന്നവരെ ആക്രമിച്ചത്.
സംഭവത്തിന് പിന്നില്‍ ആര്‍.എസ്.എസ് ആണെന്ന് ആക്രമത്തിനിരയായവര്‍ പറഞ്ഞു. അക്രമിക്കപ്പെട്ടവര്‍ സി.പി.എം അനുഭാവികളാണ്. പരുക്കേറ്റ ചുണ്ടങ്ങാപ്പൊയില്‍ ബിജിന്‍ഭവനില്‍ ബബിത്ത് (28), എരുവട്ടിപെനാങ്കിമൊട്ടയിലെ കാട്ടില്‍പറമ്പില്‍ സുജിത്ത് (36), തില്ലങ്കേരി പുതിയപുരയില്‍ഹൗസില്‍ ബിജു (31), എരുവട്ടികാപ്പുമ്മല്‍ പവിത്രത്തില്‍ ശ്യാംരൂപ് (24) എന്നിവരെ തലശേരി കോഓപ്പറേറ്റീവ് ആശുപത്രിയില്‍ പ്രവേശിപ്പിച്ചു. അക്രമികള്‍ കാര്‍ തകര്‍ത്തു. ബിജുവിന് കണ്ണിനും തലക്കും മുഖത്തുമാണ് പരുക്ക്. ബബിത്തിനെ ബൈക്ക് തടഞ്ഞ് വെട്ടിപരുക്കേല്‍പിച്ചു. തലക്ക് ആഴത്തില്‍ മുറിവുണ്ട്. ഒന്നിച്ച് ബൈക്കില്‍ വരികയായിരുന്നു സുജിത്തും ശ്യാംരൂപും. ബൈക്കിനു പിന്നിലിരിക്കുകയായിരുന്ന സുജിത്തിന്റെ കാലിന് വെട്ടേറ്റു. സി.പി.എം ഏരിയ സെക്രട്ടറി എം.സി പവിത്രന്‍, ലോക്കല്‍ സെക്രട്ടറി ടി സുധീര്‍ എന്നിവര്‍ ആശുപത്രിയില്‍ പരുക്കേറ്റവരെ സന്ദര്‍ശിച്ചു.