ഹരിയാന: ബലാത്സംഗ കേസില്‍ അറസ്റ്റിലായ ദേര സച്ചാ സൗദ തലവന്‍ ഗുര്‍മീത് റാം റഹിന്റെ വളര്‍ത്തുമകള്‍ ഹണിപ്രീത് ഒളിവില്‍ കഴിയെ മാറ്റി ഉപയോഗിച്ചത് 16 സിംകാര്‍ഡുകള്‍.

38 ദിവസങ്ങള്‍ ഒളിവില്‍ കഴിഞ്ഞ ഇവര്‍ 16 സിം കാര്‍ഡുകള്‍ക്കു പുറമെ രണ്ടു മൊബൈല്‍ ഫോണുകളും മൂന്ന് അന്താരാഷ്ട്ര സിം കാര്‍ഡുകളും ഉപയോഗിച്ചതായി പൊലിസ് പറഞ്ഞു.

ഒളിവിലായിരുന്ന സമയത്ത് ഇവര്‍ മറ്റുള്ളവരുമായി ബന്ധപ്പെട്ടിരുന്നത് വാട്ട്‌സ് ആപ്പിലൂടെയാണ്. എന്നാല്‍ ഈ സംഭാഷണങ്ങള്‍ വീണ്ടെടുക്കാന്‍ കഴിഞ്ഞിട്ടില്ല. എന്നാല്‍ ഒളിവില്‍ കഴിഞ്ഞ സമയത്ത് ബന്ധപ്പെട്ട ഏതാനും മൊബൈല്‍ നമ്പറുകളെ കുറിച്ച് ഇവര്‍ പൊലിസിനോട് വെളിപ്പെടുത്തിയിട്ടുണ്ട്.

ആഗസ്റ്റ് 25 നുണ്ടായ കലാപത്തില്‍ ഹണിപ്രീതിന്റെ പങ്കിനെ കുറിച്ച് അന്വേഷിക്കാന്‍ വേണ്ടിയാണ് ഇവരുടെ മൊബൈല്‍ ഫോണിലെ കോള്‍ വിവരങ്ങള്‍ പൊലിസ് പരിശോധിക്കുന്നത്.

ഹണിപ്രീതിന്റെ കൂട്ടാളിയായ സുഖ്ദീപ് കൗറും ഒന്നിലധികം സിം കാര്‍ഡുകള്‍ ഉപയോഗിച്ചിരുന്നതായി റിപ്പോര്‍ട്ടുണ്ട്. സുഖ്ദീപ് അറസ്റ്റിലായതിനു പിന്നാലെ ലഭിച്ച ഇയാളുടെ മൊബൈല്‍ ഫോണില്‍ നിന്നാണ് പഞ്ചാബില്‍ ഹണിപ്രീത് ഒളിച്ചിരിക്കുന്നതിനെ കുറിച്ചുള്ള വിവരം പൊലീസിന് ലഭിച്ചത്. അതേസമയം ചോദ്യം ചെയ്യലിനോട് ഹണിപ്രീത് പൂര്‍ണമായും സഹകരിക്കുന്നില്ലെന്നാണ് പൊലിസ് നല്‍കുന്ന വിവരം.