മീനങ്ങാടി: ഇന്നലെ രാത്രി വാര്യാട് ഉണ്ടായ വാഹന അപകടത്തില്‍ സുല്‍ത്താന്‍ ബത്തേരി എന്‍.എം ടൈല്‍സ് ഉടമ കല്ലുവയല്‍ ഹംസക്കയുടെ മകന്‍ എരഞ്ഞിക്കകത്ത് ഷാമില്‍ (22) മരണപ്പെട്ടു. സജീവ എസ്.കെ.എസ്.എസ്.എഫ് പ്രവര്‍ത്തകനാണ്. മലങ്കര വയല്‍ എസ്.കെ.എസ്.എസ്.എഫ് ശാഖാ ജോയിന്റ് സെക്രട്ടറിയാണ്.

ഇന്നലെ രാത്രി 11 മണിയോടെയാണ് അപകടം. ചേളാരിയില്‍ വിവാഹ ചടങ്ങില്‍ പങ്കെടുത്ത് ബത്തേരിയിലേക്ക് വരികയായിരുന്ന ഷാമില്‍ സഞ്ചരിച്ച കാര്‍ മൈസൂരില്‍ നിന്നും കോഴിമുട്ടയുമായി പാനൂരേക്ക് പോവുകയായിരുന്ന ലോറിയുമായി കൂട്ടി ഇടിക്കുകയായിരുന്നു.

കല്‍പ്പറ്റയിലെ സ്വകാര്യ ആശുപത്രിയിലും,പരുക്ക് ഗുരുതരമായതിനാല്‍ കോഴിക്കോട് മെഡിക്കല്‍ കോളേജ് ആശുപത്രിയിലും പ്രവേശിപ്പിച്ചെങ്കിലും ജീവന്‍ രക്ഷിക്കാനായില്ല. നാട്ടുകാരും ഫയര്‍ഫോഴ്‌സും കാര്‍ വെട്ടിപ്പൊളിച്ചാണ് ഷാമിലിനെ പുറത്തെടുത്തത്

ലോറി ഡ്രൈവര്‍ മൈസൂര്‍ സ്വദേശി രാജുവിനും പരുക്കുണ്ട്, ഇടിയുടെ ആഘാതത്തില്‍ കാറിന്റെ മുന്‍ഭാഗം പൂര്‍ണ്ണമായും തകര്‍ന്നു. നിയന്ത്രണം വിട്ട ലോറി സമീപത്തെ തോട്ടിലേക്ക് മറിയുകയായിരുന്നു. ഖദീജയാണ് ഷാമിലിന്റെ മാതാവ്. ഷെജീര്‍, ജംഷീര്‍, ജുനൈസ് എന്നിവര്‍ സഹോദരങ്ങളാണ്