തിരുവനന്തപുരം: അഴിമതി, സ്വജനപക്ഷപാതം എന്നീ ആരോപണത്തെ തുടര്‍ന്ന് കേരളാ സ്റ്റേറ്റ് ഐ.ടി ഇന്‍ഫ്രാസ്ട്രക്ചര്‍ ലിമിറ്റഡിന്റെ (കെ.എസ്.ഐ.ടി.ഐ.എല്‍) എം.ഡി ശ്രീറാം സാംബശിവറാവുവിനെ മാറ്റി. എം.ജി രാജമാണിക്യത്തിനാണ് പകരം ചുമതല. ഇന്നലെ ചേര്‍ന്ന മന്ത്രിസഭായോഗത്തിന്റേതാണ് തീരുമാനം.
ശ്രീറാം സാംബശിവറാവുവിനെതിരേ അഴിമതി, അനധികൃത നിയമനം എന്നീ ആരോപണങ്ങള്‍ നേരത്തെ ഉയര്‍ന്നിരുന്നു. ഇതുസംബന്ധിച്ച് വിജിലന്‍സ് അന്വേഷണത്തിന്റെ അടിസ്ഥാനത്തിലാണ് ഇദ്ദേഹത്തെ മാറ്റിയത്. മൂന്ന് ഔദ്യോഗിക വാഹനങ്ങള്‍ ഉപയോഗിക്കുന്നു, സര്‍ക്കാര്‍ പദ്ധതികള്‍ സമയബന്ധിതമായി ചെയ്യുന്നില്ല, ഫിനാന്‍സ് എക്‌സിക്യൂട്ടിവ് തസ്തികയിലെ കരാറുകാരിക്ക് അനധികൃത നിയമനത്തിന് ശ്രമിച്ചു തുടങ്ങിയ ആക്ഷേപങ്ങളാണ് സാംബശിവറാവുവിന്റെ പേരില്‍ ഉയര്‍ന്നത്.
കമ്പനിയിലെ ഫിനാന്‍സ് എക്‌സിക്യൂട്ടിവ് തസ്തികയിലേക്ക് നിലവിലെ കരാറുകാരിക്ക് അനധികൃത നിയമനത്തിന് ശ്രമിച്ചെന്നാണ് ഒടുവിലത്തെ ആരോപണം. അനധികൃത നിയമനത്തിന് യുവതിക്ക് വയസ്സിളവ് ലഭിക്കുന്നതിനുള്ള ശുപാര്‍ശ സര്‍ക്കാരില്‍ സമര്‍പ്പിച്ചതായി വാര്‍ത്തയുണ്ടായിരുന്നു. ഈ യുവതിയുടെയും സാംബശിവറാവുവിന്റെയും പേരില്‍ വ്യാപകമായ അഴിമതി ആരോപണങ്ങള്‍ നേരത്തേ ഉയര്‍ന്നിരുന്നു. ഇതുസംബന്ധിച്ച വകുപ്പുതല അന്വേഷണത്തെ തുടര്‍ന്നാണ് സര്‍ക്കാര്‍ നടപടി.