ന്യൂഡല്‍ഹി: ഗുജറാത്ത് തെരഞ്ഞെടുപ്പുമായി ബന്ധപ്പെട്ട് തെരഞ്ഞെടുപ്പ് കമ്മിഷനെ രൂക്ഷമായി വിമര്‍ശിച്ച് കോണ്‍ഗ്രസ് നേതാവും മുന്‍ കേന്ദ്ര മന്ത്രിയുമായിരുന്ന പി ചിദംബരം രംഗത്ത്. ഗുജറാത്ത് നിയമസഭ തെരഞ്ഞെടുപ്പിന്റെ തീയതി പ്രഖ്യാപിക്കാന്‍ നരേന്ദ്ര മോദിയെയാണ് തെരഞ്ഞെടുപ്പ് കമ്മിഷന്‍ ചുമതലപ്പെടുത്തിയതെന്ന് അദ്ദേഹം പരിഹസിച്ചു.

എല്ലാ ആനുകൂല്യങ്ങളും സൗജന്യങ്ങളും പ്രഖ്യാപിച്ച ശേഷം അവസാനമായിരിക്കും കമ്മിഷന്‍ തീയതി പ്രഖ്യാപിക്കുക. അവസാന റാലിയും നടത്തി മോദിക്ക് അവസരമൊരുക്കുകയാണ് കമ്മിഷന്‍. ട്വിറ്ററിലൂടെയാണ് ചിദംബരം കമ്മിഷനെ വിമര്‍ശിച്ചത്.

മോദി വ്യാജ സാന്താക്ലോസ് ചമയുകയാണ്. ജനങ്ങളെ വാഗ്ദാനം നല്‍കി സുഖിപ്പിക്കുകയാണ്. ഞായറാഴ്ച വഡോദരയില്‍ നടക്കുന്ന റാലിയില്‍ 1140 കോടിയുടെ പദ്ധതികള്‍ ഉദ്ഘാടനം ചെയ്യാനിരിക്കുകയാണ് മോദിയെന്നും ചിദംബരം പറഞ്ഞു.

നേരത്തെ ഹിമാചല്‍ പ്രദേശിലും പടിഞ്ഞാറന്‍ സംസ്ഥാനങ്ങളിലും തെരഞ്ഞെടുപ്പ് തീയതി കമ്മിഷന്‍ പ്രഖ്യാപിച്ചിരുന്നു. എന്നാല്‍, ഗുജറാത്തിലെ തീയതി പ്രഖ്യാപിക്കാത്തത് ഏറെ വിവാദത്തിനിടയാക്കുകയും ചെയ്തിരുന്നു.