ശ്രേയസിന് ആശ്വാസം; കരാര് പുതുക്കാനൊരുങ്ങി ബി.സി.സി.ഐ
ആഭ്യന്തര ക്രിക്കറ്റിലെ മികച്ച പ്രകടനത്തിന് പിന്നാലെ ഇന്ത്യന് സൂപ്പര് താരം ശ്രേയസ് അയ്യരുമായുള്ള വാര്ഷിക കരാര് ബി.സി.സി.ഐ പുതുക്കാന് തീരുമാനിച്ചു. രഞ്ജി ട്രോഫി മത്സരങ്ങളില് പങ്കെടുത്തതാണ് ശ്രേയസിന് രക്ഷയായത്. ബി.സി.സി.ഐ യെ അറിയിക്കാതെ ആഭ്യന്തര ക്രിക്കറ്റില് നിന്ന് വിട്ടുനിന്നതിനാലാണ് ഇഷാന് കിഷനേയും ശ്രേയസ് അയ്യരേയും കരാറില് ഉള്പ്പെടുത്താതിരുന്നത്. ടീമില് നിന്നും പുറത്തായ ശ്രേയസ്, പുറം വേദനയാണെന്നും അണ്ഫിറ്റാണെന്നും പറഞ്ഞാണ് രഞ്ജിയിലെ ക്വാര്ട്ടര് ഫൈനല് അടക്കം കളിക്കാതിരുന്നത്. എന്നാല് ശ്രേയസ് പൂര്ണ ഫിറ്റ് ആണെന്നും കളിക്കാന് യാതൊരുവിധ ബുദ്ധിമുട്ടും ഇല്ലെന്നായിരുന്നു ബാംഗ്ലൂരിലെ എന്സിഎ നല്കിയ റിപ്പോര്ട്ട്. ഇതോടെയാണ് ശ്രേയസിന്റെ കാര്യത്തില് ബി.സി.സി.ഐ അതൃപ്തി രേഖപ്പെടുത്തുന്നത്. ഇതോടെ വാര്ഷിക കരാറില് നിന്ന് ഒഴിവാക്കി.
നടപടിക്ക് ശേഷം ശ്രേയസ് രഞ്ജിയില് മുംബൈയ്ക്കായി സെമി ഫൈനലും ഫൈനലും കളിച്ചു. ഈ സാഹചര്യത്തിലാണ് ബിസിസിഐ ശ്രേയസിന്റെ വാര്ഷിക കരാര് പുനസ്ഥാപിക്കാന് തീരുമാനിച്ചത്. 3 കോടി വാര്ഷിക വേതനം ലഭിക്കുന്ന ഗ്രേഡ് ബി ക്യാറ്റഗറിയിലാണ് മുന്പ് ശ്രേയസ് ഇടംപിടിച്ചിരുന്നത്.
ഐപിഎല്ലില് കൊല്ക്കത്തയുടെ സുപ്രധാന താരമാണ് ശ്രേയസ്. മാര്ച്ച് 22 ന് തുടങ്ങുന്ന പുതിയ സീസണില് അദ്ദേഹം ക്യാപ്റ്റന് സ്ഥാനത്തേക്ക് തിരിച്ചെത്തും. ശ്രേയസിന്റെ അസാന്നിധ്യത്തില് നിതീഷ് റാണയാണ് കൊല്ക്കത്തയെ നയിച്ചിരുന്നത്. കഴിഞ്ഞ സീസണില് 12 പോയിന്റുമായി ഏഴാം സ്ഥാനത്തായിരുന്നു കെ.കെ.ആര്
Comments (0)
Disclaimer: "The website reserves the right to moderate, edit, or remove any comments that violate the guidelines or terms of service."