തിരുവനന്തപുരം: രാജസ്ഥാനെതിരായ രഞ്ജി പോരാട്ടത്തില്‍ കേരളത്തിന് മുന്‍തൂക്കം. രണ്ടാം ദിനം കളി നിര്‍ത്തുമ്പോള്‍ ഒന്നാം ഇന്നിങ്‌സ് തുടങ്ങിയ രാജസ്ഥാന്‍ ആറ് വിക്കറ്റ് നഷ്ടത്തില്‍ 134 റണ്‍സെന്ന നിലയില്‍ തകര്‍ച്ചയെ നേരിടുന്നു. നാല് വിക്കറ്റുകള്‍ മാത്രം ശേഷിക്കേ കേരളത്തിന്റെ ഒന്നാം ഇന്നിങ്‌സ് സ്‌കോറിനൊപ്പമെത്താന്‍ രാജസ്ഥാന് 201 റണ്‍സ് കൂടി വേണം. നേരത്തെ ഒന്നാം ഇന്നിങ്‌സില്‍ കേരളം 335 റണ്‍സെന്ന ഭേദപ്പെട്ട സ്‌കോര്‍ സ്വന്തമാക്കിയിരുന്നു.
ആറ് വിക്കറ്റുകള്‍ വീഴ്ത്തിയ ജലജ് സക്‌സേനയുടെ മാരക ബൗളിങാണ് കേരളത്തിന് കരുത്തായത്. രണ്ടാം ദിനത്തില്‍ വീണ രാജസ്ഥാന്റെ ആറ് വിക്കറ്റുകളും സക്‌സേന സ്വന്തമാക്കി. 62 റണ്‍സെടുത്ത ദിഷന്ത് യാഗ്നികിന് മാത്രമാണ് പിടിച്ചുനില്‍ക്കാന്‍ സാധിച്ചത്.
നേരത്തെ രോഹന്‍ പ്രേം (86), ജലജ് സക്‌സേന (79), ക്യാപ്റ്റന്‍ സച്ചിന്‍ ബേബി (78), സഞ്ജു സാംസണ്‍ (42) എന്നിവരുടെ ബാറ്റിങാണ് കേരളത്തിന് ഭേദപ്പെട്ട സ്‌കോര്‍ സമ്മാനിച്ചത്.