വടകര: സംസ്ഥാനത്തൊട്ടാകെ ആളില്ലാത്ത വീടുകളില്‍ കവര്‍ച്ച നടത്തുന്ന സംഘത്തിന്റെ തലവന്‍ വടകരയില്‍ അറസ്റ്റിലായി. പയ്യോളി കോട്ടക്കല്‍ ബീച്ചിലെ താരേമ്മല്‍ ഖദീജാ മന്‍സില്‍ ഫിറോസിനെയാണ് (37) വടകര സി.ഐ മധുസൂദനന്‍ നായരുടെ നേതൃത്വത്തിലുള്ള സ്‌ക്വാഡ് അറസ്റ്റ് ചെയ്തത്. ഭവനഭേദനം ആസൂത്രണം ചെയ്യുന്നതിനിടെ വടകര റെയില്‍വേ സ്റ്റേഷന്‍ പരിസരത്തു വച്ചായിരുന്നു അറസ്റ്റ്. വടകര, കൊയിലാണ്ടി, പേരാമ്പ്ര എന്നിവിടങ്ങളില്‍ നാലോളം കവര്‍ച്ചാ കേസുകളില്‍ അന്വേഷണം നടക്കുന്നതിനിടെയാണ് പ്രതി പിടിയിലായത്.
വടകര പുതുപ്പണം ശാരദാ നിവാസില്‍ അനിതയുടെ വീട് കുത്തിത്തുറന്ന് എല്‍.ഇ.ഡി ടി.വി, ഇലക്ട്രോണിക്‌സ് ഉപകരണങ്ങള്‍ എന്നിവയും കൊയിലാണ്ടിയിലെ ഫോര്‍ ജി വേള്‍ഡ്, സമീപത്തെ മൊബൈല്‍ കട എന്നിവയില്‍നിന്നായി 11 ലക്ഷം രൂപയുടെ മൊബൈല്‍ ഫോണുകളും പേരാമ്പ്ര കടിയങ്ങാട്ടുള്ള വീട് കുത്തിത്തുറന്ന് പതിനാലേ കാല്‍ പവന്‍ സ്വര്‍ണാഭരണവും പ്രതിയടക്കമുള്ള അഞ്ചംഗ സംഘമാണ് കവര്‍ന്നത്. കൂട്ടുപ്രതികളായ നാലു പേര്‍ക്കെതിരേ അന്വേഷണം തുടങ്ങിയതായി പൊലിസ് അറിയിച്ചു. വടകര വീരഞ്ചേരിയിലെ വര്‍ക്‌ഷോപ്പില്‍ അറ്റകുറ്റപ്പണികള്‍ക്കായി നിര്‍ത്തിയിട്ട ഇന്നോവ കാര്‍ മോഷ്ടിച്ചതും സംഘമാണെന്ന് പൊലിസ് പറഞ്ഞു.
മോഷ്ടിച്ച വാഹനങ്ങള്‍ അന്തര്‍ദേശീയ മയക്കുമരുന്ന് കച്ചവടത്തിന് ഉപയോഗിക്കുകയാണ് ഇവരുടെ പതിവ്. തിരുവനന്തപുരം മുതല്‍ കാസര്‍കോട് വരെയുള്ള വിവിധ പൊലിസ് സ്റ്റേഷന്‍ പരിധിയില്‍ നൂറോളം കേസുകള്‍ ഫിറോസിന്റെ പേരില്‍ നിലവിലുണ്ട്. പൊലിസ് സൈബര്‍ സെല്ലിന്റെ സഹായത്തോടെയാണ് പ്രതിയെ പിടികൂടിയത്. റൂറല്‍ എസ്.പി എം.കെ പുഷ്‌കരന്റെ മേല്‍നോട്ടത്തിലായിരുന്നു അന്വേഷണം.
വടകര ജുഡിഷ്യല്‍ ഫസ്റ്റ്ക്ലാസ് മജിസ്‌ട്രേറ്റ് കോടതിയില്‍ ഹാജരാക്കിയ പ്രതിയെ 14 ദിവസത്തേക്ക് റിമാന്‍ഡ് ചെയ്തു. എ.എസ്.ഐമാരായ സി.എച്ച് ഗംഗാധരന്‍, ബാബുരാജ്, സീനിയര്‍ സി.പി.ഒമാരായ കെ.പി രാജീവന്‍, കെ. യൂസുഫ്, വി.വി ഷാജി, വി.കെ പ്രദീപന്‍ എന്നിവരും അന്വേഷണ സംഘത്തിലുണ്ടായിരുന്നു.