ദുബൈ: സാങ്കേതിക വിദ്യ എങ്ങനെ ഉപയോഗിക്കണമെന്നും അതിന്റെ ലക്ഷ്യങ്ങളും മുൻഗണനകളും എന്താണെന്നും വ്യക്തമാക്കുന്ന ആഗോള ആർട്ടിഫിഷ്യൽ ഇന്റെലിജൻസ് (എ.ഐ) നയത്തെ കുറിച്ചുള്ള രാജ്യത്തിന്റെ ഔദ്യോഗിക നിലപാടിന് യു.എ.ഇ കാബിനറ്റ് അംഗീകാരം നൽകി. ദ്രോഹമോ അസ്ഥിരതയോ സൃഷ്ടിക്കാൻ കാരണമായേക്കാവുന്ന എ.ഐ ടൂളുകൾ വികസിപ്പിച്ച രാജ്യങ്ങളെ അന്താരാഷ്ട്ര നിയന്ത്രണങ്ങൾക്ക് ബാധകമാക്കും. അത്തരം നിയമവിധേയ നടപടികളെ യു.എ.ഇ പിന്തുണക്കുന്നതാണ്.

എ.ഐ സംവിധാനങ്ങൾ കൈകാര്യം ചെയ്യാനും സുരക്ഷിതമാക്കാനും മെച്ചപ്പെടുത്താനുമുള്ള ആഗോള സഖ്യങ്ങൾ സ്ഥാപിക്കുന്നതിനെയും രാജ്യം പിന്തുണയ്ക്കുന്നു. കൂടാതെ, സമാധാനവും സ്ഥിരതയും പ്രോത്സാഹിപ്പിക്കുന്നതിന് ലക്ഷ്യമിട്ടുള്ള ഗവേഷണ വികസന സംരംഭങ്ങളിലൂടെ എ.ഐ ആപ്ലിക്കേഷനുകളുടെ ഉത്തരവാദിത്ത ഉപയോഗത്തെ പ്രോത്സാഹിപ്പിക്കുകയും ചെയ്യുന്നു. സുരക്ഷ, സ്വകാര്യതാ സംരക്ഷണം, ഡാറ്റ സുരക്ഷ എന്നിവയും ഉറപ്പാക്കുമെന്നു യു.എ.ഇയുടെ നയത്തിൽ പറയുന്നു. 

യു.എ.ഇയെ സംബന്ധിച്ചിട ത്തോളം സാങ്കേതിക മുന്നേറ്റങ്ങൾ സമൂഹത്തിൻ്റെ ക്ഷേമം മെച്ചപ്പെടുത്തുന്നതാവണമെന്ന് ആർട്ടിഫിഷ്യൽ ഇന്റലിജൻസ്, ഡിജിറ്റൽ ഏകണോമി, റിമോട്ട് വർക്ക് ആപ്ലിക്കേഷനുകൾ എന്നിവയുടെ സഹ മന്ത്രി ഉമർ സുൽ ത്താൻ അൽ ഉലമ പറഞ്ഞു. ആർട്ടിഫിഷ്യൽ ഇന്റലിജൻസിൻ്റെ ആഗോള മാനേജ്‌മെന്റിൽ യു.എ.ഇ സുപ്രധാന പങ്കുവഹി ക്കുന്നു. അന്താരാഷ്ട്ര നയ ചർച്ചകളിൽ സജീവമായി സംഭാവന നൽകുകയും ചെയ്യുന്നു. എ.ഐയുടെ ഭാവി രൂപപ്പെടുത്തുന്ന മാനദണ്ഡങ്ങളും ചട്ടക്കൂടുകളും നിർവചിക്കുന്നതിലും യു.എ.ഇ നിർണായക തലത്തിലാണെന്നും അൽ ഉലമ വ്യക്തമാക്കി.

ഉയർന്ന സ്വാധീനമുള്ള സാങ്കേതിക പരിഹാരങ്ങളുടെ വികസനം പ്രോത്സാഹിപ്പിക്കുന്നതിനിടയിൽ, സാമ്പത്തിക വൈവിധ്യ വൽക്കരണത്തിനും നവീകരണത്തിനും എ.ഐ ഉപയോഗിക്കാൻ യു.എ.ഇയുടെ നയം ശ്രമിക്കുന്നു.

കൂടുതൽ ഗൾഫ് വാർത്തകൾക്ക് ഈ ഗ്രൂപ്പിൽ ജോയിൻ ചെയ്യുക