കോട്ടയം: മീസില്‍സ് റൂബല്ല വാക്‌സിനേഷനായി പൊതു ജനങ്ങള്‍ കൂടുതലായി സര്‍ക്കാര്‍ ആശുപത്രികളിലും ആരോഗ്യ കേന്ദ്രങ്ങളിലും എത്തിക്കൊണ്ടിരിക്കുന്നത് കണക്കിലെടുത്ത് വാക്‌സിനേഷന് കൂടുതല്‍ സൗകര്യമേര്‍പ്പെടുത്തി. ബുധനാഴ്ച സര്‍ക്കാര്‍ ആരോഗ്യ കേന്ദ്രങ്ങളില്‍ നടത്തുന്ന വാക്‌സിനേഷന്‍ ക്ലിനിക്കിള്‍ക്ക് പുറമെ ശനിയാഴ്ചകളിലും വാക്‌സിനേഷന്‍ നല്‍കുന്നതാണെന്ന് ജില്ലാ മെഡിക്കല്‍ ഓഫീസര്‍ ഡോ.ജേക്കബ് വര്‍ഗീസ് അറിയിച്ചു.
എം.ആര്‍ വാക്‌സിനേഷന്‍ പരിപാടി പൂര്‍ത്തിയാക്കുന്നത് വരെ ഈ സൗകര്യം ലഭ്യമാകുമെന്ന് ഡി.എം.ഒ അറിയിച്ചു. മറ്റ് പ്രവൃത്തി ദിനങ്ങളില്‍ സ്‌കൂളുകളിലും അങ്കണവാടികളിലും തിരഞ്ഞെടുത്ത മറ്റ് കേന്ദ്രങ്ങളിലും എത്തി ക്യാംപുകള്‍ നടത്തുന്നതാണ്.
ഒമ്പതു മാസം മുതല്‍ 15 വയസു വരെയുള്ള എല്ലാ കുട്ടികള്‍ക്കും മീസില്‍സ് റൂബല്ല എന്നീ രോഗങ്ങള്‍ക്കെതിരേയുള്ള ഒറ്റ കത്തിവയ്പാണ് നല്‍കി വരുന്നത്. ഒക്ടോബര്‍ മൂന്നിന് സംസ്ഥാനത്ത് ആരംഭിച്ച പരിപാടിയില്‍ ഇതിനോടകം ദശലക്ഷക്കണക്കിന് കുട്ടികള്‍ക്ക് സുരക്ഷിതമായി കുത്തിവയ്പ് നല്‍കിക്കഴിഞ്ഞു. യാതൊരുതര ഗൗരവ പാര്‍ശ്വഫലങ്ങളും കണ്ടെത്തിയിട്ടില്ലെന്നും കത്തിവയ്പ് എടുക്കാന്‍ വിട്ടു പോയിട്ടുള്ളവര്‍ ഈ സൗകര്യം പരമാവധി പ്രയോജനപ്പെടുത്തണ മെന്നും ഡി.എം.ഒ അഭ്യര്‍ത്ഥിച്ചു.