ദമാം: വ്യാജ സര്‍ട്ടിഫിക്കറ്റ് ആരോപണ വിഷയത്തില്‍ മോചനത്തിനായി കേരളം ഇടപെടുന്നു. സഊദിയില്‍ നല്‍കിയ സര്‍ട്ടിഫിക്കറ്റുകള്‍ വ്യാജമാണെന്ന കണ്ടെത്തലിനെ തുടര്‍ന്നാണു മലയാളികളടക്കമുള്ള വിദേശികള്‍ പിടിയിലാകുന്ന സംഭവം. ഇതേ തുടര്‍ന്നാണ് ദമാമിലെ സാമൂഹിക പ്രവര്‍ത്തകരുടെ പരാതിയെ തുടര്‍ന്നാണ് വിഷയത്തില്‍ ഇടപെടാന്‍ കേരള സര്‍ക്കാര്‍ തയാറായത്. മലയാളികള്‍ പിടിക്കപ്പെട്ടത് വ്യാപകമായപ്പോള്‍ നയതത്ര ഇടപെടല്‍ ആവശ്യമാണെന്ന മുന്നറിയിപ്പുമായി സുപ്രഭാതം നേരത്തെ വാര്‍ത്ത പ്രസിദ്ധീകരിച്ചിരുന്നു.

ഇതിനകം തന്നെ നൂറോളം മലയാളി നഴ്‌സുമാരാണ് സഊദിയില്‍ ഇതേ പ്രശ്‌നത്തില്‍ പിടിയിലായിട്ടുള്ളത്. ഈ മേഖലയില്‍ തൊഴിലെടുക്കുന്ന നഴ്‌സുമാരാരുടെ സര്‍ട്ടിഫിക്കറ്റുകള്‍ പരിശോധിക്കുന്നത് സ്വകാര്യ കമ്പനിയാണ്. സമര്‍പ്പിച്ച രേഖകള്‍ സ്ഥാപനവുമായി ബന്ധപ്പെടുത്തിയാണ് പരിശോധന നടത്തുന്നത്. എന്നാല്‍, പലരും പഠന സമയത്തോ, പരിചയ കാലത്തോ ഉപയോഗിച്ചിരുന്ന അംഗീകൃത സ്ഥാപനങ്ങള്‍ സഊദി കമ്പനി പരിശോധന സമയത്ത് പൂട്ടി പോയതോ, സര്‍ക്കാരുകള്‍ സ്ഥാപനങ്ങളുടെ അനുമതി റദ്ദാകുകയോ ചെയ്തതാണ് ഇവര്‍ക്ക് വിനയാകുന്നത്. ഇതോടെ യൂണിവേഴ്‌സിറ്റികള്‍ അംഗീകരിച്ചതായാലും പഠിച്ച സ്ഥാപനം നിലവിലില്ലെങ്കില്‍ സര്‍ട്ടിഫിക്കറ്റുകള്‍ വ്യാജമായി കണക്കാക്കും.

നേരത്തെ നഴ്‌സുമാര്‍ ഇന്ത്യന്‍ എംബസ്സിയുടെ സഹായം തേടിയിരുന്നു.എന്നാല്‍ യാതൊരു നടപടിയും ഉണ്ടായില്ല .ജയിലിലായ മലയാളികളടക്കം നിരവധി പേര്‍ മോചനം കാത്തിരിക്കുകയാണ്. വിവിധ യൂണിവേഴ്‌സിറ്റികളില്‍ അംഗീകൃത കോഴ്‌സ് പഠിച്ചിറങ്ങിയവരും പിടിയിലാകുന്നുണ്ട്.

കഴിഞ്ഞ നാല് മാസങ്ങളില്‍ പിടിയിലായ ഇത്തരത്തിലെ നൂറോളം മലയാളികളില്‍ ഇരുപതോളം പേര്‍ അറസ്റ്റിലായി ജയിലിലാണ്. ഇത്തരക്കാര്‍ക്ക് കേന്ദ്ര സര്‍ക്കാരുമായി ബന്ധപ്പെട്ട് വേണ്ട നിയമ സഹായം ലഭ്യമാകുമെന്നാണ് കേരളം സര്‍ക്കാര്‍ അറിയിച്ചത്.