ന്യൂഡല്‍ഹി: പൂര്‍ണ വളര്‍ച്ച എത്തിയില്ലെങ്കില്‍ സ്വന്തം ഗര്‍ഭം അലസിപ്പിക്കാനുള്ള അവകാശം സ്ത്രീക്കുണ്ടെന്ന് സുപ്രിം കോടതി. തന്റെ അനുമതിയില്ലാതെ ഗര്‍ഭം അലസിപ്പിക്കാനുള്ള തീരുമാനം തടയണമെന്നാവശ്യപ്പെട്ട് യുവതിയുമായി അകന്നുകഴിയുന്ന ഭര്‍ത്താവ് നല്‍കിയ ഹരജി തള്ളി ചീഫ്ജസ്റ്റിസ് ദീപക് മിശ്ര, ജസ്റ്റിസുമാരായ എ.എം ഖാന്‍വില്‍കര്‍, ഡി.വൈ ചന്ദ്രചൂഡ് എന്നിവരടങ്ങിയ മൂന്നംഗ ബെഞ്ചിന്റേതാണ് ഉത്തരവ്.
തന്റെ അനുമതിയില്ലാതെ ഗര്‍ഭഛിദ്രം നടത്തുന്നത് നിയമവിരുദ്ധമാണെന്നും യുവതിയും അവരുടെ വീട്ടുകാരും ഗര്‍ഭഛിദ്രത്തിനു നേതൃത്വം നല്‍കിയ ഡോക്ടറും തനിക്കു നഷ്ടപരിഹാരം നല്‍കണമെന്നും ഹരജിക്കാരന്‍ ആവശ്യപ്പെട്ടിരുന്നു.
ഇതുസംബന്ധിച്ച കേസ് നേരത്തെ പഞ്ചാബ്- ഹരിയാന ഹൈക്കോടതി തള്ളിയിരുന്നു. ഇതോടെയാണ് ഹരജിക്കാരന്‍ സുപ്രിം കോടതിയെ സമീപിച്ചത്. ഗര്‍ഭം അലസിപ്പിക്കുകയും ഗര്‍ഭം ധരിക്കലും സ്ത്രീകളുടെ സവിശേഷാധികാരത്തില്‍പ്പെട്ടതാണെന്നും ഉത്തരവില്‍ നേരത്തെ ഹൈക്കോടതി ചൂണ്ടിക്കാട്ടിയിരുന്നു.

വര്‍ഗീയ പരാമര്‍ശവുമായി ആര്‍.എസ്.എസ് മേധാവി
ഇന്‍ഡോര്‍: ഹിന്ദുസ്ഥാന്‍ ഹിന്ദുക്കളുടെ രാജ്യമാണെന്ന വാദവുമായി ആര്‍.എസ്.എസ് തലവന്‍ മോഹന്‍ ഭാഗവത് രംഗത്ത്. ഇന്നലെ ഇന്‍ഡോറില്‍ ആര്‍.എസ്.എസ് പ്രവര്‍ത്തകരായ കോളജ് വിദ്യാര്‍ഥികളുടെ സമ്മേളനത്തില്‍ സംസാരിക്കുകയായിരുന്നു അദ്ദേഹം. എന്നാല്‍, മറ്റുള്ളവര്‍ക്കുകൂടി ഇവിടെ അവകാശമുണ്ട്. അവരെ ഒരുകാരണവശാലും പുറത്താക്കാനാകില്ലെന്നും അദ്ദേഹം കൂട്ടിച്ചേര്‍ത്തു. ജര്‍മനിയെന്ന രാജ്യം ജര്‍മന്‍കാരുടേതാണ്. ബ്രിട്ടന്‍ ബ്രിട്ടീഷുകാരുടെയും അമേരിക്ക അമേരിക്കക്കാരുടേതുമാണ്. ഇതുപോലെയാണ് ഹിന്ദുസ്ഥാനും. ഹിന്ദു എന്നത് അര്‍ഥമാക്കുന്നത് ഭാരതമാതാവിന്റെ മക്കള്‍ എന്ന നിലയിലാണ്. ഇന്ത്യന്‍ പാരമ്പര്യം അനുസരിച്ച് ജീവിക്കുന്നവരെല്ലാം ഹിന്ദു എന്ന വിശേഷണത്തില്‍ ഉള്‍പ്പെടും. ഒരു നേതാവിനോ പാര്‍ട്ടിക്കോ മാത്രമായി രാജ്യത്തെ വികസനത്തിലേക്ക് എത്തിക്കാന്‍ കഴിയില്ല. അതിന് സമൂഹം തയാറാകേണ്ടതുണ്ടെന്നും അദ്ദേഹം പറഞ്ഞു.