റിയോ ഡി ജനീറോ: വനിതാ വിഭാഗം ഹോക്കിയില്‍ ഒരു മത്സരം പോലും ജയിക്കാതെ ഇന്ത്യ പുറത്തായി. അവസാന മത്സരത്തില്‍ എതിരില്ലാത്ത അഞ്ചു ഗോളിന് അര്‍ജന്റീനയോടാണ് ഇന്ത്യ പരാജയപ്പെട്ടത്. ആശ്വാസ ജയവുമായി റിയോയില്‍ നിന്നു മടങ്ങാമെന്ന ഇന്ത്യയുടെ സ്വപ്നങ്ങള്‍ ആദ്യ രണ്ടു ക്വാര്‍ട്ടറില്‍ തന്നെ അര്‍ജന്റീന തകര്‍ത്തു.
ഇരട്ട ഗോളുകള്‍ നേടി മാര്‍ട്ടീന കാവാലെറോ അര്‍ജന്റീനയുടെ ടോപ് സ്‌കോററായി. മാര്‍ട്ടീന ഗ്രനറ്റോ, കാര്‍ല റെബെച്ചി, അഗസ്റ്റീന ആല്‍ബെര്‍ട്ടേറിയോ എന്നിവര്‍ ശേഷിച്ച ഗോള്‍ സ്വന്തമാക്കി.
മത്സരത്തില്‍ തുടരെ ലഭിച്ച പെനാല്‍റ്റി കോര്‍ണറുകള്‍ മുതലാക്കാന്‍ അര്‍ജന്റീനയ്ക്ക് സാധിച്ചു. എന്നാല്‍ ഗോള്‍ കീപ്പര്‍ സവിതയുടെ മികച്ച പ്രകടനം ഇല്ലായിരുന്നെങ്കില്‍ ഇന്ത്യയുടെ തോല്‍വി ഇതിലും ദയനീയമാകുമായിരുന്നു. അതേസമയം അവസാന രണ്ടു ക്വാര്‍ട്ടറില്‍ മികവുറ്റ പ്രതിരോധമൊരുക്കാന്‍ ഇന്ത്യക്ക് സാധിച്ചു. പക്ഷേ മുന്നേറ്റത്തില്‍ അത്തരമൊരു മികവില്ലാത്തത് ഇന്ത്യക്ക് തിരിച്ചടിയായി.