കൊച്ചി: സംസ്ഥാനത്ത് ബി.ജെ.പി - ആര്‍.എസ്.എസ് പ്രവര്‍ത്തകര്‍ കൊല്ലപ്പെട്ട കേസുകളില്‍ സി.ബി.ഐ അന്വേഷണം ആവശ്യപ്പെട്ട ഹരജി രാഷ്ട്രീയ നേട്ടത്തിനു വേണ്ടിയാണെന്നും ഗൂഢാലോചനയുടെ ഭാഗമാണെന്നും സംസ്ഥാന സര്‍ക്കാര്‍ ഹൈക്കോടതിയില്‍. പൊതു താല്‍പര്യമെന്ന പേരില്‍ സ്വകാര്യ പരാതിയാണ് ഹരജിയിലുള്ളതെന്നു സര്‍ക്കാര്‍ പറയുന്നു. ആര്‍.എസ്.എസിന്റെയും ബി.ജെ.പിയുടെയും നേതാക്കള്‍ സ്ഥാപിച്ച സമിതി നിക്ഷിപ്ത താല്‍പര്യത്തോടെയാണ് ഹരജി നല്‍കിയത്. ബി.ജെ.പി - ആര്‍.എസ്.എസ് പ്രവര്‍ത്തകര്‍ കൊല്ലപ്പെട്ട ഏഴ് കേസിലെ പ്രതികളെ ഹരജിയില്‍ കക്ഷി ചേര്‍ത്തിട്ടില്ല. വസ്തുതകളുടെ പിന്‍ബലമില്ലാതെ, ആരോപണങ്ങള്‍ മാത്രമുള്ള ഹരജിയില്‍ സി.ബി.ഐ അന്വേഷണം ആവശ്യമില്ല. സി.ബി.ഐ അന്വേഷണം ആവശ്യപ്പെട്ട് ഹൈക്കോടതി പരിഗണിക്കുന്ന പല ഹരജികളിലും കേസുകളുടെ ബാഹുല്യം പറഞ്ഞ് സാധാരണ ഒഴിയാറുള്ള സി.ബി.ഐ ഈ കേസില്‍ ആദ്യഘട്ടത്തില്‍ തന്നെ അന്വേഷണത്തിനുള്ള സന്നദ്ധത അറിയിച്ചു.
കേന്ദ്രം ഭരിക്കുന്ന പാര്‍ട്ടിയുടെ നിര്‍ദേശപ്രകാരമാണ് സി.ബി.ഐ ഇതിനു തയാറായതെന്ന് സൂചനയുണ്ട്. സി.ബി.ഐ കൂട്ടിലടച്ച തത്തയാണെന്ന് കരുതേണ്ടിയിരിക്കുന്നു. ശ്രീകാര്യം രാജേഷടക്കം എട്ടുപേര്‍ കൊല്ലപ്പെട്ട സംഭവത്തില്‍ രജിസ്റ്റര്‍ ചെയ്ത ഏഴു കേസുകള്‍ സി.ബി.ഐ അന്വേഷിക്കണമെന്നാവശ്യപ്പെട്ട് കണ്ണൂരിലെ ഗോപാലന്‍ അടിയോടി വക്കീല്‍ സ്മാരക സമിതി നല്‍കിയ ഹരജിയില്‍ ആഭ്യന്തരവകുപ്പ് അണ്ടര്‍ സെക്രട്ടറി എം.പി പ്രിയമോള്‍ ആണ് സര്‍ക്കാരിനുവേണ്ടി സത്യവാങ്മൂലം നല്‍കിയത്. ഹരജി നവംബര്‍ 13 ലേക്ക് മാറ്റി.