മെക്‌സിക്കോ സിറ്റി: മെക്‌സിക്കന്‍ ഗ്രാന്‍ഡ് പ്രീയില്‍ ഒന്‍പതാം സ്ഥാനത്താണ് ഫിനിഷ് ചെയ്തതെങ്കിലും മെഴ്‌സിഡസിന്റെ ലൂയിസ് ഹാമില്‍ട്ടന്‍ ലോക കിരീടത്തില്‍ മുത്തമിട്ടു. താരത്തിന്റെ നാലാം ലോക കിരീടമാണിത്. മത്സരത്തില്‍ മുഖ്യ എതിരാളി സെബാസ്റ്റ്യന്‍ വെറ്റലുമായി കൂട്ടിയിടിച്ച ഹാമില്‍ട്ടന് ഒന്‍പതാം സ്ഥാനത്ത് ഫിനിഷ് ചെയ്യാനേ സാധിച്ചുള്ളൂ.
മത്സരത്തില്‍ ഡച്ച് താരം മാക്‌സ് വെര്‍സ്റ്റാപ്പന്‍ കിരീടം നേടി. മത്സരത്തില്‍ വെറ്റല്‍ ജയിച്ചിരുന്നെങ്കില്‍ കിരീടം ഉറപ്പിക്കാന്‍ ആദ്യ അഞ്ചില്‍ ഫിനിഷ് ചെയ്യേണ്ടതുണ്ടായിരുന്നു ഹാമില്‍ട്ടന്. എന്നാല്‍ അതുണ്ടായില്ല. ബ്രിട്ടീഷ് ഫോര്‍മുല വണ്ണിലെ ഏക്കാലത്തെയും മികച്ച താരങ്ങളുടെ പട്ടികയില്‍ ഇടംപിടിക്കാനും താരത്തിന് സാധിച്ചു. സര്‍ ജാക്കി സ്റ്റ്യുവര്‍ട്ടിനെ മറികടക്കാനും ഹാമില്‍ട്ടന് സാധിച്ചു.
നാലു കിരീടങ്ങളുമായി സെബാസ്റ്റ്യന്‍ വെറ്റല്‍, അലെയ്ന്‍ പ്രോസ്റ്റ് എന്നിവര്‍ക്കൊപ്പം ഇടംപിടിക്കാനും ഹാമില്‍ട്ടന് സാധിച്ചു. ഏഴു കിരീടങ്ങളുമായി മൈക്കല്‍ ഷൂമാക്കറാണ് ഒന്നാം സ്ഥാനത്ത്.