ഗാന്ധിനഗര്‍: കള്ളപ്പണക്കാരേയും കരിഞ്ചന്തക്കാരേയും പിടികൂടുമെന്ന് പറഞ്ഞ് അധികാരത്തില്‍ വന്ന മോദി, എത്രകള്ളപ്പണക്കാരെ പിടികൂടി ജയിലിലടച്ചുവെന്ന് വ്യക്തമാക്കണമെന്ന് കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധി. ഗുജറാത്തിലെ ജമ്പുസാറില്‍ നടന്ന തെരഞ്ഞെടുപ്പുറാലിയില്‍ സംസാരിക്കുകയായിരുന്നു അദ്ദേഹം.

സ്വിസ് ബാങ്കില്‍ കള്ളപ്പണം നിക്ഷേപിച്ചത് എത്രപേരുണ്ട്. ഇവരെ ആരെയെങ്കിലും ജയിലിലെത്തിക്കാന്‍ മോദിക്ക് കഴിഞ്ഞിട്ടുണ്ടോയെന്നും അദ്ദേഹം ചോദിച്ചു.
കള്ളപ്പണത്തിനെതിരേയാണ് തന്റെ യുദ്ധമെന്നാണ് പ്രധാനമന്ത്രി പറയുന്നത്. എന്നിട്ടും സ്വിസ് ബാങ്കില്‍ നിക്ഷേപിച്ച പണത്തെക്കുറിച്ചോ, ഇവിടെ ആര്‍ക്കൊക്കെ അക്കൗണ്ട് ഉണ്ട് എന്ന കാര്യത്തെക്കുറിച്ചോ വ്യക്തമാക്കാന്‍ അദ്ദേഹത്തിന് ഇതുവരെ ആയിട്ടില്ല.
മോദി അധികാരത്തില്‍ വന്നിട്ട് മൂന്നുവര്‍ഷമായി. ഈ വര്‍ഷങ്ങള്‍ക്കിടയില്‍ ഏതെങ്കിലും കള്ളപ്പണക്കാരനെ പിടികൂടി അദ്ദേഹത്തിന് ജയിലിലടയ്ക്കാന്‍ കഴിഞ്ഞിട്ടുണ്ടോയെന്നും രാഹുല്‍ ചോദിച്ചു.
എന്നാല്‍ കള്ളപ്പണക്കാരെ പിടികൂടാനെന്ന് പറഞ്ഞ് നടപ്പാക്കിയ നോട്ട് നിരോധനവും, തുടര്‍ന്ന് സാമ്പത്തിക പരിഷ്‌കരണത്തിന്റെ ഭാഗമായി കൊണ്ടുവന്ന ജി.എസ്.ടിയും യഥാര്‍ഥത്തില്‍ ബാധിച്ചത് ചെറുകിട വ്യാപാരിക ളെയും തൊഴിലാളികളേയും കര്‍ഷകരെയുമാണ്. ഗുജറാത്തിലേയും കേന്ദ്രത്തിലേയും ബി.ജെ.പി സര്‍ക്കാര്‍ എപ്പോഴും പരിഗണിക്കുന്നത് വന്‍കിട വ്യവസായികളേയാണ്.

സംസ്ഥാനത്ത് പട്ടേല്‍ സമുദായക്കാരുടെ വോട്ട് അനുകൂലമാക്കാന്‍ ഹാര്‍ദിക് പട്ടേലുമായി കോണ്‍ഗ്രസ് ബറൂച്ചയിലും സുറത്തിലും വച്ച് നിരവധി തവണ ചര്‍ച്ച നടത്തിയിട്ടുണ്ട്. ഡിസംബറില്‍ നടക്കുന്ന തെരഞ്ഞെടുപ്പില്‍ ബി.ജെ.പിയ്‌ക്കെതിരേ കോണ്‍ഗ്രസ് വിശാലസഖ്യത്തിനുള്ള നീക്കം സജീവമാക്കിയിട്ടുണ്ട്.