കൊടുവള്ളി: യുവാവിനെ വാഹനത്തില്‍ തട്ടിക്കൊണ്ടുപോയി കൊലപ്പെടുത്താന്‍ ശ്രമമെന്ന് പരാതി. കിഴക്കോത്ത് കച്ചേരിമുക്ക് വടക്കേതൊടുകയില്‍ നജീബിന്റെ മകന്‍ ജുനൈദിനെയാണ് (19) കാറിലും ബൈക്കിലുമെത്തിയ എട്ടംഗ സംഘം തട്ടിക്കൊണ്ടുപോകാന്‍ ശ്രമിച്ചത്. ബുധനാഴ്ച രാത്രി എട്ടോടെയായിരുന്നു സംഭവം.
ഓമശ്ശേരിയില്‍നിന്ന് ബൈക്കില്‍ വീട്ടിലേക്കു പോവുകയായിരുന്ന ജുനൈദിനെ പിന്തുടര്‍ന്ന സംഘം ആരാമ്പ്രത്ത് വച്ച് ബൈക്കില്‍ കാറിടിപ്പിച്ച് തെറിപ്പിക്കുകയും ബലമായി കാറില്‍ കയറ്റി ക്രൂരമായി മര്‍ദിക്കുകയും അര്‍ധ രാത്രി ഒന്നോടെ താമരശ്ശേരി അമ്പായത്തോട്ടില്‍ റോഡരികില്‍ തള്ളുകയുമായിരുന്നു. യുവാവ് കോഴിക്കോട് മെഡിക്കല്‍ കോളജ് ആശുപത്രിയില്‍ ചികിത്സയിലാണ്. സംഭവത്തില്‍ കൊടുവള്ളി പൊലിസ് കേസെടുത്തു.