തിരുവനന്തപുരം: ജമ്മു കശ്മിരിനെതിരായ രഞ്ജി ക്രിക്കറ്റില്‍ കേരളത്തിന് ലീഡ്. കേരളത്തിന്റെ ഒന്നാം ഇന്നിങ്‌സ് 219 റണ്‍സില്‍ അവസാനിപ്പിച്ച് ബാറ്റിങിനിറങ്ങിയ ജമ്മുവിനെ 173 റണ്‍സില്‍ പുറത്താക്കി കേരളം 46 റണ്‍സിന്റെ നിര്‍ണായക ഒന്നാം ഇന്നിങ്‌സ് ലീഡ് പിടിച്ചെടുക്കുകയായിരുന്നു.
രണ്ടാം ദിനം കളി നിര്‍ത്തുമ്പോള്‍ കേരളം രണ്ടാം ഇന്നിങ്‌സില്‍ ഒരു വിക്കറ്റ് നഷ്ടത്തില്‍ 45 റണ്‍സെന്ന നിലയില്‍. 20 റണ്‍സെടുത്ത വിഷ്ണു വിനോദിന്റെ വിക്കറ്റാണ് കേരളത്തിന് നഷ്ടമായത്. 16 റണ്‍സുമായി ജലജ് സക്‌സേനയും ആറ് റണ്‍സുമായി രോഹന്‍ പ്രേമുമാണ് ക്രീസില്‍. ഒന്‍പത് വിക്കറ്റുകള്‍ കൈയിലിരിക്കേ കേരളത്തിന് മൊത്തം 91 റണ്‍സ് ലീഡ്.
നേരത്തെ കേരളത്തെ 219 റണ്‍സില്‍ പുറത്താക്കി ഒന്നാം ഇന്നിങ്‌സ് തുടങ്ങിയ ജമ്മു കശ്മിരിന് കാര്യമായി സ്‌കോര്‍ ചെയ്യാന്‍ സാധിക്കാതെ പോയി. നാല് വിക്കറ്റുകള്‍ വീഴ്ത്തിയ കെ.സി അക്ഷയ്, മൂന്ന് വീതം വിക്കറ്റുകളെടുത്ത ജലജ് സക്‌സേന, സിജോമോന്‍ ജോസഫ് എന്നിവരുടെ ബൗളിങാണ് ജമ്മുവിനെ കുറഞ്ഞ സ്‌കോറില്‍ ഒതുക്കാന്‍ കേരളത്തിന് തുണയായത്. ഒപണിങ് വിക്കറ്റില്‍ മികച്ച പ്രകടനവുമായി കളം നിറഞ്ഞ ജമ്മുവിന് പിന്നീട് തുടരെ വിക്കറ്റുകള്‍ നഷ്ടമാകുകയായിരന്നു.
ഓപണര്‍മാരായ ബന്‍ഡി (35), ഖജുരിയ (41) എന്നിവര്‍ തിളങ്ങി. മധ്യനിരയില്‍ ക്യാപ്റ്റന്‍ പര്‍വേസ് റസൂല്‍ (28), ബന്ദീപ് സിങ് (39) എന്നിവരും പിടിച്ചുനിന്നു. മറ്റൊരാള്‍ക്കും കാര്യമായൊന്നും ചെയ്യാന്‍ സാധിച്ചില്ല. നേരത്തെ സഞ്ജു സാംസണ്‍ നേടിയ (112) സെഞ്ച്വറിയാണ് കേരളത്തിന്റെ സ്‌കോര്‍ 200 കടത്തിയത്.