തിരുവനന്തപുരം: ഇന്ദിരാഗാന്ധി ജന്മശതാബ്ദി ആഘോഷത്തിന്റെ ഭാഗമായി കോണ്‍ഗ്രസിന്റെ മുതിര്‍ന്ന നേതാക്കള്‍ക്ക് നിസ്വാര്‍ഥ സേവനത്തിനുള്ള അംഗീകാരമായി പാര്‍ട്ടി 'ഇന്ദിരാഗാന്ധി പുരസ്‌കാരം'നല്‍കി ആദരിക്കും. കെ.പി.സി.സി. മുന്‍ പ്രസിഡന്റുമാരായ തെന്നല ബാലകൃഷ്ണപിള്ള, സി.വി പത്മരാജന്‍, മുന്‍ ഗവര്‍ണര്‍മാരായ എം.എം ജേക്കബ്, കെ.ശങ്കരനാരായണന്‍, വക്കം പുരുഷോത്തമന്‍, മുന്‍മന്ത്രി എം.കമലം എന്നിവര്‍ക്കാണ് ജന്മശതാബ്ദി പുരസ്‌കാരം നല്‍കുന്നത്.
ഇന്ന് വൈകുന്നേരം അഞ്ചു മണിക്ക് തിരുവനന്തപുരം ഇന്ദിരാഭവനില്‍ സംഘടിപ്പിക്കുന്ന യോഗത്തില്‍ കോണ്‍ഗ്രസ് പ്രവര്‍ത്തക സമിതി അംഗം എ.കെ ആന്റണി പുരസ്‌കാരം സമ്മാനിക്കും. കെ.പി.സി.സി. പ്രസിഡന്റ് എം.എം ഹസന്‍ അധ്യക്ഷനാകുന്ന യോഗത്തില്‍ മുന്‍ മുഖ്യമന്ത്രി ഉമ്മന്‍ചാണ്ടി, വി.എം സുധീരന്‍, കെ. മുരളീധരന്‍ പങ്കെടുക്കും.
ഇന്നലെ പാലാ ടൗണ്‍ ഹാളില്‍ സംഘടിപ്പിച്ച പ്രത്യേക ചടങ്ങില്‍ എം.എം ജേക്കബിന് പുരസ്‌കാരം എ.കെ ആന്റണി സമ്മാനിച്ചു. എം. കമലത്തിനുള്ള പുരസ്‌കാര സമര്‍പ്പണം കോഴിക്കോട്ട് പിന്നീട് നടത്തും.