ഗാന്ധിനഗര്‍: ഗുജറാത്തില്‍ ഭീതിയിലായ ബി.ജെ.പി മുന്‍നിര നേതാക്കളെ തന്നെ കളത്തിലിറക്കി പ്രചാരണം ശക്തമാക്കി. പ്രധാനമന്ത്രി മോദിയും ദേശീയ അധ്യക്ഷന്‍ അമിത്ഷായും തന്നെയാണ് സ്റ്റാര്‍ പ്രചാരകര്‍. കഴിഞ്ഞ ദിവസങ്ങളിലായി രാഹുല്‍ ഗാന്ധി ശക്തമായ ആരോപണങ്ങളുമായി പ്രചാരണ രംഗത്ത് നിറഞ്ഞു നിന്നപ്പോള്‍ സ്വന്തം തട്ടകത്തില്‍ അടിപതറാതിരിക്കാനായി അമിത്ഷായും ഇന്നലെ സംസ്ഥാനത്ത് എത്തി.
രാഹുലിനെതിരേ അഞ്ച് ചോദ്യങ്ങളുമായാണ് അദ്ദേഹം പ്രചാരണം തുടങ്ങിയത്. നര്‍മദ പദ്ധതിയുടെ പൂര്‍ത്തീകരണത്തിനു യു.പി.എ സര്‍ക്കാര്‍ അനുമതി നല്‍കാതിരുന്നത് എന്തുകൊണ്ട്്? നര്‍മദ അണക്കെട്ടിന്റെ ഗേറ്റുകള്‍ അടയ്ക്കാന്‍ കോണ്‍ഗ്രസ് എന്തുകൊണ്ട് അനുമതി നല്‍കിയില്ല? കച്ചിലെ ഉപ്പ് നിര്‍മാണ തൊഴിലാളികള്‍ക്ക് പ്രത്യേക സഹായം നല്‍കാതിരുന്നത് എന്തുകൊണ്ട്്? യുപിഎ അധികാരത്തിലിരുന്നപ്പോള്‍ ഗാന്ധിനഗറിന് ധനസഹായം നല്‍കാതിരുന്നത് എന്തുകൊണ്ട്്? ക്രൂഡ് ഓയില്‍ ധനസഹായം വര്‍ഷങ്ങളോളം ഗുജറാത്തിന് അനുവദിക്കാതിരുന്നതിനു പിന്നില്‍ എന്തായിരുന്നു? എന്നിങ്ങനെ അഞ്ച് ചോദ്യങ്ങളാണ് അദ്ദേഹം രാഹുലിനെതിരേ ഉന്നയിച്ചത്.