ദോഹ: സംസ്‌കൃതി കേരളോത്സവം- 2017 നവംബര്‍ 9,10,11 തിയതികളില്‍ സ്‌കില്‍സ് ഡെവലപ്‌മെന്റ് സെന്ററില്‍ നടക്കുമെന്നു സംസ്‌കൃതി ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. മൂന്നു ദിവസങ്ങളിലായി നടക്കുന്ന പരിപാടിയില്‍ വിവിധ മേഖലകളില്‍ നിന്നുള്ള പ്രമുഖര്‍ പങ്കെടുക്കും. സാഹിത്യകാരനും ദേശാഭിമാനി വാരിക എഡിറ്ററുമായ പ്രൊഫ. സി.പി അബൂബക്കര്‍, ആറന്മുള എം.എല്‍.എ വീണാ ജോര്‍ജ്, ഗായകന്‍ വി.ടി മുരളി എന്നിവര്‍ വിവിധ പരിപാടികളില്‍ പങ്കെടുക്കും.
9ന് വൈകിട്ട് 7ന് ഈ വര്‍ഷത്തെ സംസ്‌കൃതി സി.വി ശ്രീരാമന്‍ സാഹിത്യ പുരസ്‌കാരം അവാര്‍ഡ് ജേതാവായ ശ്രീദേവി വടക്കേടത്തിന് ജൂറി ചെയര്‍മാന്‍ പ്രൊഫ. സി.പി അബൂബക്കര്‍ സമ്മാനിക്കും. 50,000 രൂപയും പ്രശസ്തി പത്രവുമാണ് അവാര്‍ഡ്. തുടര്‍ന്ന് സംസ്‌കൃതി അവതരിപ്പിക്കുന്ന നാടകം 'സ്വപ്നങ്ങള്‍ പൂക്കുന്ന നാട്' അരങ്ങേറും.