തിരുവനന്തപുരം: തോമസ് ചാണ്ടി രാജിവയ്ക്കണമെന്ന കാര്യത്തില്‍ നിലപാട് കടുപ്പിച്ച് സി.പി.ഐ. മന്ത്രി സ്ഥാനത്തു നിന്ന് തോമസ് ചാണ്ടിയെ പുറത്താക്കണമെന്ന് സി.പി.എമ്മിനോട് ആവശ്യപ്പെട്ടെന്ന് സി.പി.ഐ സംസ്ഥാന സെക്രട്ടറി കാനം രാജേന്ദ്രന്‍ പറഞ്ഞു.

ഇക്കാര്യത്തില്‍ നിയമോപദേശം തേടേണ്ട ആവശ്യമില്ലായിരുന്നു. തോമസ് ചാണ്ടി അധികാരത്തില്‍ തുടരുന്ന ഓരോ നിമിഷവും മുന്നണി നാറും. രാജിക്കാര്യത്തില്‍ വിട്ടുവീഴ്ച വേണ്ടെന്ന് സി.പി.ഐ നിലപാട് അറിയിച്ചു.

വിഷയത്തില്‍ സര്‍ക്കാരിന് എ.ജിയുടെ നിയമോപദേശം ലഭിച്ചതിനു പിന്നാലെയാണ് സി.പി.ഐ നിലപാട് വ്യക്തമാക്കിയത്. നിയമോപദേശം സര്‍ക്കാരിന്റെ പരിഗണനയിലാണെങ്കിലും ഉള്ളടക്കം എന്താണെന്ന് വ്യക്തമല്ല.

ഭൂമി കൈയേറ്റവുമായി ബന്ധപ്പെട്ട് ആലപ്പുഴ ജില്ലാ കലക്റ്ററുടെ അന്തിമ റിപ്പോര്‍ട്ടിന്മേലുള്ള നിയമോപദേശമാണ് സര്‍ക്കാരിന് ലഭിച്ചിരിക്കുന്നത്. അതേസമയം, തോമസ് ചാണ്ടി വിഷയം ചര്‍ച്ച ചെയ്യാന്‍ അടിയന്തിര എല്‍.ഡി.എഫ് യോഗം മറ്റന്നാള്‍ ചേരുന്നുണ്ട്.

തോമസ് ചാണ്ടിയുടെ രാജിയാവശ്യം ശക്തമായതിനെത്തുടര്‍ന്ന് സമ്മര്‍ദത്തിലായ എല്‍.ഡി.എഫ് അദ്ദേഹത്തെ പിന്തുണക്കുന്ന നിലപാടായിരുന്നു സ്വീകരിച്ചിരുന്നത്. ചാണ്ടി രാജി വയ്‌ക്കേണ്ടതില്ലെന്നാണ് ഇന്ന് എന്‍.സി.പി നേതൃത്വവും അറിയിച്ചിരുന്നത്.