ന്യൂഡല്‍ഹി: പ്രധാനമന്ത്രി നരേന്ദ്ര മോദിയുടെ ഇഷ്ട പദ്ധതിയായ സ്വച്ഛ് ഭാരത് മിഷനെതിരേ രൂക്ഷ വിമര്‍ശനവുമായി ഐക്യരാഷ്ട്ര സംഘടനയുടെ മനുഷ്യാവകാശ കൗണ്‍സില്‍ പ്രതിനിധി ലിയോ ഹെല്ലര്‍.
സമഗ്രമായ മനുഷ്യാവകാശം ഉറപ്പാക്കുന്നതില്‍ സ്വച്ഛ് ഭാരത് പദ്ധതി പരാജയപ്പെട്ടതായി അദ്ദേഹം ചൂണ്ടിക്കാട്ടി. സ്വച്ഛ് ഭാരത് പദ്ധതിയില്‍ ശൗചാലയം നിര്‍മിക്കുകയെന്നത് മാത്രമാകരുതെന്നും സുരക്ഷിതമായ കുടിവെള്ളം ജനങ്ങള്‍ക്ക് ഉറപ്പുവരുത്തുക കൂടി ചെയ്യണമെന്നും അദ്ദേഹം ആവശ്യപ്പെട്ടു. ഇന്ത്യയിലെ വിവിധ സ്ഥലങ്ങളില്‍ സന്ദര്‍ശനം നടത്തിയ ശേഷം തയാറാക്കിയ റിപ്പോര്‍ട്ടിലാണ് അദ്ദേഹം സര്‍ക്കാരിനെതിരേ വിമര്‍ശനം ഉന്നയിച്ചത്.
കുടിവെള്ളവും ശുചിത്വവുമായി ബന്ധപ്പെട്ട മനുഷ്യാവകാശ വിഷയങ്ങളിന്മേലുള്ള ഐക്യരാഷ്ട്ര സഭയുടെ പ്രത്യേക പ്രതിനിധിയാണ് ലിയോ. ഇന്ത്യയിലെ തന്റെ സന്ദര്‍ശനത്തെ സംബന്ധിച്ച് തയാറാക്കിയ റിപ്പോര്‍ട്ട് പുറത്തിറക്കിയാണ് അദ്ദേഹം കേന്ദ്രത്തെ വിമര്‍ശിച്ചത്.
ശൗചാലയം നിര്‍മിക്കുക മാത്രമല്ല ശുദ്ധമായ കുടിവെള്ളം ലഭ്യമാക്കുകയെന്നതും മനുഷ്യരുടെ അവകാശമാണ്. കഴിഞ്ഞ രണ്ടാഴ്ചയായി ഇന്ത്യയുടെ വിവിധ ഭാഗങ്ങളില്‍ സന്ദര്‍ശിച്ചിരുന്നു. ഇവിടങ്ങളില്‍ ജനങ്ങള്‍ വലിയതോതില്‍ മനുഷ്യാവകാശ ലംഘനത്തിന് ഇരകളാകുന്നുണ്ടെന്ന് കണ്ടെത്തിയിട്ടുണ്ടെന്നും ലിയോ പറയുന്നു. എല്ലായിടത്തും സ്വച്ഛ് ഭാരതിന്റെ ലോഗോ ആയ മഹാത്മാ ഗാന്ധിയുടെ കണ്ണട കണ്ടു. പദ്ധതിയുടെ പ്രവര്‍ത്തനം മൂന്നുവര്‍ഷമായി. ആ സാഹചര്യത്തില്‍ ഈ കണ്ണട മനുഷ്യാവകാശത്തിന്റേതായി മാറ്റേണ്ടതുണ്ടെന്ന് അദ്ദേഹം പറഞ്ഞു.
ശുചിമുറികള്‍ നിര്‍മിക്കുന്നതുസംബന്ധിച്ച് ഉദ്യോഗസ്ഥരില്‍ സമ്മര്‍ദ്ദം ചെലുത്തുന്നതിനെയും അദ്ദേഹം വിമര്‍ശിച്ചു. ശുചിമുറി നിര്‍മിക്കാത്തതിന്റെ പേരില്‍ ഉദ്യോഗസ്ഥര്‍ ഇടപെട്ട് വീട്ടിലേക്കുള്ള വൈദ്യുതി വിച്ഛേദിച്ചും റേഷന്‍ കാര്‍ഡ് റദ്ദാക്കിയതുമായ സംഭവങ്ങള്‍ ഉണ്ടായി. ഇത്തരത്തില്‍ മനുഷ്യാവകാശം ലംഘിക്കരുതായിരുന്നു.
അതേസമയം യു.എന്‍ പ്രതിനിധിയുടെ വിമര്‍ശനത്തിനെതിരേ സര്‍ക്കാര്‍ രംഗത്തെത്തി. രാഷ്ട്രപിതാവിനെ അവഹേളിക്കുന്ന തരത്തിലാണ് ലിയോയുടെ പ്രതികരണമെന്ന് സര്‍ക്കാര്‍ പുറത്തിറക്കിയ പത്രക്കുറിപ്പിലൂടെ വ്യക്തമാക്കി. ഗുരുതരമായ അറിവില്ലായ്മ കൊണ്ടാണ് രാഷ്ട്രപിതാവിനെതിരായി അദ്ദേഹം പ്രസ്താവന നടത്തിയത്.
മനുഷ്യാവകാശങ്ങള്‍ക്കുവേണ്ടി ഗാന്ധിജി എപ്രകാരമാണ് നിലകൊണ്ടതെന്ന് ലോകത്തിന് അറിയാവുന്നതാണെന്നും കേന്ദ്ര സര്‍ക്കാര്‍ പ്രസ്താവനയില്‍ പറഞ്ഞു.