മുംബൈ: ശ്രീലങ്കക്കെതിരായ ആദ്യ രണ്ട് ടെസ്റ്റുകള്‍ക്കുള്ള ഇന്ത്യന്‍ ടീമില്‍ നിന്ന് ഓള്‍ റൗണ്ടര്‍ ഹര്‍ദിക് പാണ്ഡ്യയെ ഒഴിവാക്കി. വിശ്രമം അനുവദിക്കാന്‍ സെലക്ഷന്‍ കമ്മിറ്റി തീരുമാനിച്ചതിനെ തുടര്‍ന്നാണ് ആദ്യ രണ്ട് കളികള്‍ക്കുള്ള ടീമിലേക്ക് താരത്തെ പരിഗണിക്കാതിരുന്നത്. അതേസമയം പകരം മറ്റൊരു താരത്തെ ടീമില്‍ ഉള്‍പ്പെടുത്തിയിട്ടില്ല.
24കാരനായ ഹര്‍ദിക് സമീപ കാലത്ത് ഇന്ത്യയുടെ മൂന്ന് വിഭാഗം ടീമുകളിലും അവിഭാജ്യ ഘടകമായി മാറിയിരുന്നു.
ബാറ്റ് കൊണ്ടും പന്ത് കൊണ്ടും ടീമിന് കനപ്പെട്ട സംഭാവന നല്‍കാന്‍ ഹര്‍ദികിന് സാധിച്ചതോടെ കഴിഞ്ഞ ജൂണില്‍ ഇംഗ്ലണ്ടില്‍ വച്ച് അരങ്ങേറിയ ചാംപ്യന്‍സ് ട്രോഫി മുതല്‍ ടീമിലെ സ്ഥിരം സാന്നിധ്യമാണ്. വലിയ പരുക്കുകള്‍ നേരിടാതിരിക്കാനുള്ള മുന്‍കരുതല്‍ നടപടിയെന്ന നിലയിലാണ് ഹര്‍ദികിന് വിശ്രമം അനുവദിക്കുന്നതെന്ന് ബി.സി.സി.ഐ വ്യക്തമാക്കി.
ഈ മാസം 16 മുതല്‍ 20 വരെ കൊല്‍ക്കത്തയിലെ ഈഡന്‍ ഗാര്‍ഡനിലാണ് ആദ്യ ടെസ്റ്റ് അരങ്ങേറുന്നത്.