മഡ്ഗാവ്: എ.എഫ്.സി കപ്പ് യോഗ്യതാ പോരാട്ടത്തില്‍ ഇന്ത്യ ഇന്ന് മ്യാന്‍മറിനെ നേരിടും. മക്കാവുവിനെ പരാജയപ്പെടുത്തി നേരത്തെ തന്നെ യോഗ്യത നേടിയ ഇന്ത്യ സമ്മര്‍ദമില്ലാതെയാണ് മത്സരത്തിനിറങ്ങുന്നത്. തുടര്‍ച്ചയായ 12 ജയങ്ങളുമായാണ് ഇന്ത്യയുടെ വരവ്. ജയിക്കാനായാല്‍ പോയിന്റ് പട്ടികയില്‍ നേട്ടമുണ്ടാക്കാന്‍ ടീമിന് സാധിക്കും.
പട്ടികയില്‍ മ്യാന്‍മറിനും കിര്‍ഗിസ്താനിനും നാലു പോയിന്റുണ്ട്. ഇന്ത്യക്കെതിരേ ജയിക്കാന്‍ സാധിച്ചാല്‍ മ്യാന്‍മറിന് ഗുണംചെയ്യും. നേരത്തെ സ്വന്തം തട്ടകത്തില്‍ നടന്ന പോരാട്ടത്തില്‍ ഇന്ത്യയോട് എതിരില്ലാത്ത ഒരു ഗോളിന് അവര്‍ പരാജയപ്പെട്ടിരുന്നു. ഗോവയിലെ ഫത്തോര്‍ദ സ്റ്റേഡിയത്തിലാണ് മത്സരം നടക്കുന്നത്. ഇന്ത്യയിലെ സാഹചര്യം മനസിലാക്കുന്നതിന് മൂന്നു ദിവസം മുന്‍പേ മ്യാന്‍മര്‍ എത്തിയിട്ടുണ്ട്. അതേസമയം സുനില്‍ ഛേത്രിയുടെ ഫോമാണ് ഇന്ത്യ ലക്ഷ്യമിടുന്നത്.