അടയ്ക്കാത്തോട്: രാമച്ചിയില്‍ കാട്ടാനക്കൂട്ടം തെങ്ങുകള്‍ നശിപ്പിച്ചു. രാമച്ചി സ്വദേശി പള്ളി വാതുക്കല്‍ ഇട്ട്രാച്ചന്റെ ഇരുപതോളം തെങ്ങുകളാണ് കാട്ടാനക്കുട്ടം നശിപ്പിച്ചത്. ഇതോടെ ഒരു വര്‍ഷത്തിനിടയില്‍ എഴുപതിലധികം തെങ്ങുകളാണ് ഇദ്ദേഹത്തിന്റെ മാത്രമായി കാട്ടാനക്കൂട്ടം നശിപ്പിച്ചത്. അതേസമയം വനംവകുപ്പ് ഉദ്യോഗസ്ഥരുടെ കെടുകാര്യസ്ഥതയാണ് വന്യജീവികള്‍ നാട്ടിലേക്ക് ഇറങ്ങുവാനുള്ള സാഹചര്യമൊരുക്കിയതെന്ന് ഇദ്ദേഹം ആരോപിച്ചു.
വന്യമൃഗശല്യം നേരിടുന്നതിനായി വളയംചാല്‍ മുതല്‍ കരിയം കാപ്പ് വരെ ആന മതില്‍ നിര്‍മിച്ചിട്ടുണ്ടെങ്കിലും അവശേഷിക്കുന്ന ഭാഗം മതില്‍ നിര്‍മാണം നടത്താത്തതാണ് ഈ പ്രദേശത്തു താമസിക്കുന്നവര്‍ക്ക് വിനയായി മാറിയത്. വനാതിര്‍ത്തിയില്‍ സ്ഥാപിച്ച ഫെന്‍സിങ് കാര്യക്ഷമമായി പ്രവര്‍ത്തിപ്പിക്കാന്‍ വനം വകുപ്പ് ശ്രമിക്കാത്തതാണ് പ്രശ്‌നത്തിന് കാരണമെന്നും ഇദ്ദേഹം പറയുന്നു.