റിയാദ്: ലബനാനില്‍ നിന്നും തട്ടികൊണ്ടുപോയ സഊദി പൗരനെ വിട്ടയച്ചു. ലബനാന്‍ വനിതയായ ഫാസില അസീറിനെ വിവാഹം ചെയ്ത സഊദി പൗരനായ അലി അല്‍ ബശ്‌റവി (32) യെയാണ് രണ്ടു ദിവസം മുന്‍പ് തട്ടിക്കൊണ്ടു പോയത്. ഇദ്ദേഹത്തെ സല്‍ സയ്യിദ് അലി മരുഭൂമിയില്‍ വച്ച് രണ്ടു കാറുകളിലെത്തിയ സംഘം ലബനീസ് ആര്‍മിക്ക് കൈമാറുകയായിരുന്നുവെന്നാണ് റിപ്പോര്‍ട്ട്. ഇദ്ദേഹം ഇപ്പോള്‍ ലബനാന്‍ ആര്‍മിയുടെ കസ്റ്റഡിയിലാണ്. ഇദ്ദേഹത്തെ പൂര്‍ണ്ണമായും വിട്ടുകിട്ടുന്നതിനായി ലബനാനിലെ സഊദി എംബസി സൈന്യവുമായി ബന്ധപ്പെട്ടിട്ടുണ്ട്. 

ഇദ്ദേഹത്തിന്റെ മോചനത്തിനായി ഒരു മില്യന്‍ ഡോളറാണ് അക്രമികള്‍ ആവശ്യപ്പെട്ടതായി നേരത്തെ വാര്‍ത്തയുണ്ടായിരുന്നു. എന്നാല്‍, മോചനം സാധ്യമാക്കുന്നതിന്ന് മോചന ദ്രവ്യം നല്‍കിയിട്ടുണ്ടോ എന്ന കാര്യം വ്യക്തമല്ല.

ലബനാനും സഊദിയും തമ്മില്‍ ബന്ധം വഷളായതിന് പിന്നാലെയാണ് സഊദി പൗരനെ തട്ടിക്കൊണ്ടുപോയത്. ഇദ്ദേഹത്തെ വീടിന് സമീപത്തു നിന്നുമാണ് തട്ടിക്കൊണ്ട് പോയത്. ഇദ്ദേഹത്തിന്റെ ഭാര്യയാണ് സംഭവം പൊലിസിനെ അറിയിച്ചത്. സഊദിയിലെ കിഴക്കന്‍ പ്രവിശ്യയിലെ ദമാമിലാണ് സഊദി പൗരന്റെ കുടുംബ സ്ഥലം.