ചെര്‍ക്കള: ജില്ലകളിലെ മുഴുവന്‍ മദ്‌റസകളിലെയും ചലനങ്ങള്‍ ശാക്തീകരിക്കുന്നതിന്റെ ഭാഗമായി സമസ്ത കേരള ജംഇയ്യത്തുല്‍ മുഅല്ലിമീന്‍ ജില്ലാ കമ്മിറ്റി സംഘടിപ്പിക്കുന്ന ജില്ലാ സാരഥി സംഗമം 18നു ചെര്‍ക്കള ഖുവ്വത്തുല്‍ ഇസ്‌ലാം മദ്‌റസ ഓഡിറ്റോറിയത്തില്‍ നടക്കും. ജില്ലയിലെ മുഴുവന്‍ റെയ്ഞ്ച് ഭാരവാഹികളും മദ്‌റസ മാനേജ്‌മെന്റ് കമ്മിറ്റിയും സദ്ര്‍ ഉസ്താദ്മാരും പങ്കെടുക്കുന്ന സംഗമം സമസ്ത ജില്ലാ പ്രസിഡന്റ് ത്വാഖ അഹ്മദ് അല്‍ അസ്ഹരി ഉസ്താദ് ഉദ്ഘാടനം ചെയ്യും. സമസ്ത പൊതു പരീക്ഷയില്‍ സംസ്ഥാന-ജില്ലാടിസ്ഥാനത്തില്‍ റാങ്കുകള്‍ കരസ്ഥമാക്കിയ വിദ്യാര്‍ഥികള്‍ക്കുള്ള കാഷ് അവാര്‍ഡുകളുടെയും ട്രോഫികളുടെയും വിതരണം യു.എം അബ്ദു റഹ്മാന്‍ മൗലവി നിര്‍വഹിക്കും. ഉസ്താദുമാര്‍ക്കുള്ള ഉപഹാര സമര്‍പ്പണം എം.എ ഖാസിം മുസ്‌ലിയാര്‍ നിര്‍വഹിക്കും. സമസ്ത കേരള ഇസ്‌ലാം മത വിദ്യാഭ്യാസ ബോര്‍ഡ് ഏര്‍പ്പെടുത്തിയ മികച്ച മദ്‌റസക്കുള്ള കോട്ടുമല ഉസ്താദ് സ്മാരക അവാര്‍ഡിന് അര്‍ഹരായി സംസ്ഥാന തലത്തില്‍ ഒന്നും മൂന്നും സ്ഥാനങ്ങള്‍ കരസ്ഥമാക്കിയ ചന്തേര, ഉദുമ പടിഞ്ഞാര്‍ എന്നീ മദ്‌റസക്കുള്ള സ്‌നോപഹാരവും വിതരണം ചെയ്യും. 'മദ്‌റസാ ശാക്തീകരണത്തിന്റെ നൂതന രീതികള്‍' എന്ന വിഷയത്തില്‍ ഡോ.സുബൈര്‍ ഹുദവി ചേകന്നൂര്‍ വിഷയാവതരണം നടത്തും.
ഇതു സംബന്ധിച്ചു ചേര്‍ന്ന റെയ്ഞ്ച് സെക്രട്ടറിമാരുടെ യോഗത്തില്‍ ജില്ലാ പ്രസിഡന്റ് ടി.പി അലി ഫൈസി, ജനറല്‍ സെക്രട്ടറി സയ്യിദ് ഹുസൈന്‍ തങ്ങള്‍, ലത്തീഫ് മൗലവി ചെര്‍ക്കള, ഹാശിം ദാരിമി ദേലമ്പാടി, അബൂബക്കര്‍ സാലൂദ് നിസാമി, നൂറുദ്ദീന്‍ മൗലവി പെരുമ്പട്ട പങ്കെടുത്തു.