കൊല്ലം: പാര്‍ലമെന്റ് തെരഞ്ഞെടുപ്പില്‍ സി.പി.ഐ ഏത് മുന്നണിയില്‍ പോകുമെന്ന് അറിയില്ലെന്ന് സി.പി.എം സംസ്ഥാന സെക്രട്ടറിയേറ്റംഗം ആനത്തലവട്ടം ആനന്ദന്‍. സി.പി.എം കൊല്ലം ഏരിയാസമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. ചാമ്പ്യന്‍മാര്‍ തങ്ങളാണെന്നും സര്‍ക്കാര്‍ മോശമാണെന്നും വരുത്തിത്തീര്‍ക്കാന്‍ സി.പി.ഐ ശ്രമിക്കുകയാണ്. തോളത്തിരുന്ന് ചെവികടിക്കുന്ന പണിയാണ് സി.പി.ഐ നടത്തുന്നത്. അവര്‍ക്ക് ഒറ്റയ്ക്ക് ഒരു ചുക്കും ചെയ്യാന്‍ പറ്റില്ലെന്ന് അദ്ദേഹം പറഞ്ഞു. വലിയവായില്‍ സംസാരിക്കുന്ന സി.പി.ഐ സര്‍ക്കാരിനെ ക്ഷീണിപ്പിക്കാനാണ് ശ്രമിക്കുന്നത്. സോളാര്‍ സമരം അവസാനിപ്പിച്ചത് ഒത്തുകളിയാണെന്ന് അന്ന് സി.പി.ഐ ആരോപിച്ചിരുന്നു. എന്നാല്‍ കമ്മിഷന്‍ റിപ്പോര്‍ട്ട് പുറത്തുവന്നപ്പോള്‍ സി.പി.ഐ എന്തു പറയുന്നുവെന്നും തോമസ് ചാണ്ടിയെ പിണറായി എന്തിന് സംരക്ഷിക്കണമെന്നും ആനത്തലവട്ടം ആനന്ദന്‍ ചോദിച്ചു. ചാണ്ടിയേക്കാള്‍ ജനങ്ങളുടെ സമ്പത്തുള്ള പാര്‍ട്ടിയാണ് സി.പി.എം എന്നും അദ്ദേഹം പറഞ്ഞു.