തിരുവനന്തപുരം: വിനോദ സഞ്ചാര വകുപ്പിനു കീഴിലുള്ള മുസിരിസ് പൈതൃക പദ്ധതിക്കു വേണ്ടി സിഡിറ്റ് തയാറാക്കിയ 'ഞാന്‍ മുഹമ്മദ് അബ്ദുറഹ്മാന്‍' എന്ന വിഡിയോ ഡോക്യുമെന്ററി മുഖ്യമന്ത്രി പിണറായി വിജയന്‍ പ്രകാശനം ചെയ്തു.
സ്വാതന്ത്ര്യ സമര സേനാനി, പത്രപ്രവര്‍ത്തകന്‍, നിയമസഭാ സാമാജികന്‍ എന്നീ നിലകളില്‍ പ്രവര്‍ത്തിച്ചിട്ടുള്ള മുഹമ്മദ് അബ്ദുറഹ്മാന്‍ ഇന്ത്യന്‍ ദേശീയ പ്രസ്ഥാനത്തിനും മതേതരത്വത്തിനും സ്വന്തംജീവിതം സമര്‍പ്പിച്ച ദേശാഭിമാനിയാണ്. മുഹമ്മദ് അബ്ദുറഹ്മാന്റെ ജന്മഗൃഹമായ കൊടുങ്ങല്ലൂര്‍ കറുകപ്പാടത്ത് സാക്ഷാത്കരിക്കുന്ന മ്യൂസിയത്തില്‍ പ്രദര്‍ശിപ്പിക്കുന്നതിനായി തയാറാക്കിയ ഡോക്യുമെന്ററി സംവിധാനം ചെയ്തത് കെ. മോഹന്‍ കുമാറാണ്.
സഹകരണ, ടൂറിസം, ദേവസ്വം മന്ത്രി കടകംപള്ളി സുരേന്ദ്രന്‍ അധ്യക്ഷത വഹിച്ച ചടങ്ങില്‍ സിഡിറ്റ് രജിസ്ട്രാര്‍ ജി. ജയരാജ്, മുസിരിസ് പൈതൃക പദ്ധതി മാനേജിങ് ഡയരക്ടര്‍ നൗഷാദ് തുടങ്ങിയവര്‍ സംബന്ധിച്ചു.