തൊട്ടില്‍പ്പാലം: മൊബൈല്‍ ഫോണ്‍ നമ്പര്‍ ആധാറുമായി ബന്ധിപ്പിച്ച തൊഴിലുറപ്പ് തൊഴിലാളിയുടെ വേതനം നഷ്ടപ്പെട്ടതായി പരാതി. മരുതോങ്കര പഞ്ചായത്തിലെ തൊഴിലുറപ്പ് തൊഴിലാളിയായ തൂവാട്ടപൊയിലിലെ പാലോറ ജാനുവിനാണ് വേതനം നഷ്ടമായത്. എയര്‍ടെല്‍ കമ്പനിയുടെ പേയ്‌മെന്റ് ബാങ്ക് ആയ എയര്‍ടെല്‍ മണി അക്കൗണ്ടിലേക്കാണ് പണം മാറിയിരിക്കുന്നത്.
സെപ്റ്റംബര്‍ മാസത്തെ വേതനം പഞ്ചായത്ത് ആധാര്‍ നമ്പറിലേക്ക് അയച്ചപ്പോള്‍ ജാനു അറിയാതെയാണ് ഈ മറിമായം സംഭവിച്ചത്. നേരത്തേ മരുതോങ്കര ഗ്രാമീണ്‍ ബാങ്കിലേക്ക് വന്നുകൊണ്ടണ്ടിരുന്ന പണം, ആധാറുമായി ഇവരുടെ എയര്‍ടെല്‍ നമ്പര്‍ ബന്ധിപ്പിച്ചതോടെ മൊബൈല്‍ കമ്പനിയുടെ പേയ്‌മെന്റ് ബാങ്ക് അക്കൗണ്ടിലേക്ക് പോവുകയായിരുന്നു. 3,144 രൂപയാണ് നഷ്ടമായത്.
പണം താന്‍ അറിയാതെ എങ്ങനെ എയര്‍ടെല്‍ ബാങ്കിങിലേക്ക് മാറിയെന്നത് സംബന്ധിച്ച് അന്വേഷണം ആവശ്യപ്പെട്ട് ജാനു ജില്ലാ കലക്ടര്‍ക്ക് പരാതി നല്‍കിയിട്ടുണ്ടണ്ട്. മരുതോങ്കര പഞ്ചായത്തില്‍ ഇത്തരത്തില്‍ കൂടുതല്‍ സ്ത്രീകള്‍ പരാതിയുമായി എത്തിയതായും സംഭവം ഗൗരവമേറിയതാണെന്നും പഞ്ചായത്ത് പ്രസിഡന്റ് കെ.എം സതി പറഞ്ഞു.