ജിദ്ദ: ഇന്ത്യന്‍ സമൂഹത്തിന് മികച്ച സേവനം ചെയ്യുന്ന സന്നദ്ധ പ്രവര്‍ത്തകരെ എയര്‍ ഇന്ത്യ റിയാദില്‍ ആദരിച്ചു. ടോപ് ടെണ്‍ അചീവ്‌മെന്റ് നേടിയ ട്രാവല്‍ ഏജന്‍സികള്‍ക്കുളള ഉപഹാരവും വിതരണം ചെയ്തു. യോഗത്തില്‍ എയര്‍ ഇന്ത്യാ സ്റ്റേഷന്‍ മാനേജര്‍ കുന്ദന്‍ലാല്‍ ഗോത്വാല്‍ അധ്യക്ഷത വഹിച്ചു.

എയര്‍ ഇന്ത്യ എന്നും യാത്രക്കാരോട് അങ്ങേയറ്റം പ്രതിബദ്ധതയും അനുകമ്പയുമാണ് പുലര്‍ത്തുന്നതെന്ന് ജനറല്‍ മാനേജര്‍ മെല്‍വിന്‍ ഡിസില്‍വ പറഞ്ഞു. യുദ്ധസാഹചര്യം നിലനില്‍ക്കുമ്പോള്‍ പോലും 99 രാജ്യങ്ങളിലെ പൗരന്‍മാരെ യമനില്‍ നിന്നു രക്ഷപ്പെടുത്താന്‍ എയര്‍ ഇന്ത്യക്കു കഴിഞ്ഞു. കൂടുതല്‍ നഗരങ്ങളുമായി ബന്ധിപ്പിക്കുന്നതിനുളള ശ്രമങ്ങള്‍ തുടരുകയാണെന്നും അദ്ദേഹം വ്യക്തമാക്കി.

പ്രവാസി ഭാരതീയ സമ്മാന്‍ പുരസ്‌കാര ജേതാക്കളായ ഷിഹാബ് കൊട്ടാകാട്, സീനത്ത് ജഫ്‌റി, മികച്ച അധ്യാപകനുളള രാഷ്ട്രപതി അവാര്‍ഡ് നേടിയ റിയാദ് ഇന്റര്‍നാഷണല്‍ ഇന്ത്യന്‍ സ്‌കൂള്‍ പ്രിന്‍സിപ്പല്‍ ഡോ. ഷൗക്കത്ത് പര്‍വേസ്, ഡോ. ദില്‍ഷാദ് അഹമദ് എന്നിവരെ ചടങ്ങില്‍ ആദരിച്ചു. ടോപ് ടെണ്‍ അചീവ്‌മെന്റ് നേടിയ ട്രാവല്‍ ഏജന്‍സികള്‍ക്കുളളള ഉപഹാരം എയര്‍ ഇന്ത്യ ദുബൈ റീജിയനല്‍ മാനേജര്‍ മൊഹിത് സെന്‍, കുന്ദന്‍ലാല്‍ ഗോത്വാല്‍ എന്നിവര്‍ സമ്മാനിച്ചു.

ഇന്ത്യന്‍ എംബസി ഡപ്യൂട്ടി ചീഫ് ഓഫ് മിഷന്‍ ഡോ. സുഹൈല്‍ അജാസ് ഖാന്‍, ഫസ്റ്റ് സെക്രട്ടറിമാരായ വി. നാരായണന്‍, ഡോ. ഹിഫ്‌സുറഹ്മാന്‍, കേണല്‍ മനീഷ്, ഡോ. രാം ബാബു എന്നിവര്‍ പ്രസംഗിച്ചു.