തിരുവനന്തപുരം: അധ്യാപകനിയമനത്തില്‍ ക്രമക്കേട് ആരോപിച്ച് കേരള സര്‍വകലാശാലാ വൈസ് ചാന്‍സലര്‍ ഡോ. പി.കെ രാധാകൃഷ്ണനെ സിന്‍ഡിക്കേറ്റ് അംഗങ്ങള്‍ സിന്‍ഡിക്കേറ്റ് ഹാളില്‍ പൂട്ടിയിട്ടു.

രാവിലെ 10ന് സിന്‍ഡിക്കേറ്റ് യോഗം തുടങ്ങി രണ്ട് അജന്‍ഡകള്‍ ചര്‍ച്ചക്ക് എടുത്തശേഷമാണ് അധ്യാപക നിയമനം പരിഗണിച്ചത്.

എല്ലാ സിന്‍ഡിക്കേറ്റംഗങ്ങളും ബഹളമുണ്ടാക്കിയതിനെ തുടര്‍ന്ന് യോഗം അവസാനിപ്പിച്ച് പുറത്തേക്ക് പോകാന്‍ വി.സി ശ്രമിച്ചു.

ഇതിനിടെ സിന്‍ഡിക്കേറ്റ് ഹാളിന്റെ രണ്ട് വാതിലുകളും പൂട്ടിയിട്ട് അംഗങ്ങള്‍ വി.സിയെ തടഞ്ഞുവയ്ക്കുകയായിരുന്നു.

ഇതിനിടെ ഡി.വൈ.എഫ്.ഐ, എസ്.എഫ്.ഐ പ്രവര്‍ത്തകര്‍ സര്‍വകലാശാലയുടെ ഗേറ്റ് തകര്‍ത്ത് അകത്തുകയറി. വി.സിയുടെ ഓഫീസിനടുത്തുവരെ ഇവരെത്തി. എന്നാല്‍ പൊലിസ് സമരക്കാരെ വിരട്ടിയോടിച്ചു. ജലപീരങ്കിയും പ്രയോഗിച്ചു.