കണ്ണൂര്‍: യൂത്ത് ലീഗ് പ്രവര്‍ത്തകന്‍ മുഹമ്മദ് അസ്‌ലമിനെ(22) വെട്ടിക്കൊന്ന കേസിന്റെ അന്വേഷണം കണ്ണൂരിലേക്കും നീളുന്നു. തലശേരി താലൂക്കിലെ ചില രാഷ്ട്രീയ ക്രിമിനലുകള്‍ക്ക് കൊലപാതകത്തില്‍ പങ്കുണ്ടോയെന്നാണ് പൊലിസ് അന്വേഷിക്കുന്നത്. കൊലപാതകം നടന്ന സ്ഥലത്തു നിന്നു തെല്ലുമാറി വടകര സഹകരണാശുപത്രിക്കു സമീപം കണ്ടെത്തിയ ഇന്നോവ കാറിന്റെ ആര്‍.സി ഉടമ ബേപ്പൂര്‍ സ്വദേശിയാണെന്നു വ്യക്തമായിട്ടുണ്ട്. എന്നാല്‍ ആറുതവണ കൈമാറ്റം ചെയ്യപ്പെട്ട കാറില്‍ ഒരുകണ്ണൂര്‍ സ്വദേശിയും ഉള്‍പ്പെടുന്നുണ്ട്. ഇപ്പോഴത്തെ ഉടമ ആരാണെന്ന അന്വേഷണമാണ് പൊലിസ് നടത്തിവരുന്നത്. വാടകയ്ക്കു വിട്ടുകൊടുക്കുന്ന വാഹനം ഉപയോഗിച്ചാണ് കൃത്യം നടത്തിയതെന്നാണ് സൂചന. ടി.പി വധത്തിനു സമാനമായ രീതിയിലാണ് അസ്‌ലമിനെയും അക്രമികള്‍ ആസൂത്രിതമായി വകവരുത്തിയത്. ഓഗസ്റ്റ് 12ന് വൈകിട്ട് അഞ്ചരയോടെ സുഹൃത്ത് പുളിയാവിലെ ഷാഫിക്കൊപ്പം വെള്ളൂര്‍ ഭാഗത്തേക്ക് പോകുമ്പോള്‍ ചാലപ്പുറം-വെള്ളൂര്‍ റോഡില്‍ ചക്കരക്കണ്ടിക്കു സമീപംവച്ചാണ് ആക്ടിവ സ്‌കൂട്ടറില്‍ സഞ്ചരിച്ചിരുന്ന ഷാജിയെ ഇന്നോവ ഉപയോഗിച്ച് ഇടിച്ചുവീഴ്ത്തി വെട്ടിക്കൊന്നത്. 67വെട്ടുകളാണ് അസ്‌ലമിന്റെ ദേഹത്തുള്ളത്. ഇതില്‍ 17 എണ്ണം മുഖത്താണെന്ന് പോസ്റ്റുമോര്‍ട്ടം റിപ്പോര്‍ട്ടില്‍ പറയുന്നു. 57 വെട്ടേറ്റു കൊല്ലപ്പെട്ട ടി. പി ചന്ദ്രശേഖരന്റെ മുഖവും ചിതറിപ്പോയിരുന്നു. ടി.പി വധവുമായുള്ള സാമ്യതയാണ് അസ്‌ലം വധക്കേസിന്റെ അന്വേഷണം തലശേരി താലൂക്കിലെ രാഷ്ട്രീയ കൊലപാതകസംഘങ്ങളിലേക്ക് പൊലിസിനെ എത്തിക്കുന്നത്. അസ്‌ലമിന്റെ സുഹൃത്ത് ഷാഫിയുടെ മൊഴി കേന്ദ്രീകരിച്ചാണ് പൊലിസ് അന്വേഷണവുമായി മുന്നോട്ടുപോകുന്നത്. ചൊക്ലിയില്‍ നിന്നും വന്ന സംഘമാണ് കൊലപാതകത്തിനു പിന്നിലെന്നാണ് പൊലിസിന്റെ അനൗദ്യോഗിക വിലയിരുത്തല്‍. ഇവര്‍ കണ്ണൂരിലേക്കു കടന്നതായും സംശയിക്കുന്നുണ്ട്. എന്നാല്‍ ഇതു സ്ഥിരീകരിച്ചിട്ടില്ല. തൂണേരി വെള്ളൂരില്‍ ഡി.വൈ.എഫ്.ഐ പ്രവര്‍ത്തകന്‍ ഷിബിന്‍ കൊല്ലപ്പെട്ട കേസില്‍ മൂന്നാംപ്രതിയായിരുന്നു അസ്‌ലം. ഈ കേസില്‍ കോടതി കുറ്റവിമുക്തനാക്കിയതോടെ അസ്‌ലമടക്കമുള്ളവര്‍ക്കു നേരെ ഭീഷണിയുയര്‍ന്നിരുന്നു. കൊലപാതകത്തെ തുടര്‍ന്നുണ്ടായ സംഭവവികാസങ്ങളില്‍ മുസ്‌ലിംലീഗ് സമചിത്തത പാലിച്ചത് പ്രദേശത്ത്‌സമാധാനം സൃഷ്ടിച്ചിട്ടുണ്ട്. എന്നാല്‍ കേസിലെ യഥാര്‍ഥ പ്രതികളെ ഉടന്‍പിടികൂടാന്‍ കഴിഞ്ഞില്ലെങ്കില്‍ നാദാപുരം മേഖല വീണ്ടും അശാന്തമായേക്കും. നാദാപുരം എ.എസ്.പി കറുപ്പസ്വാമിയാണ് കേസന്വേഷണം നടത്തുന്നത്. വടകര താലൂക്കിലെയും സമീപപ്രദേശങ്ങളിലെയും പത്തു പൊലിസ് സ്‌റ്റേഷന്‍ പരിധിയില്‍ നിരോധനാജ്ഞ പ്രഖ്യാപിച്ചിട്ടുണ്ട്.